Làasoode 9

Wɛ̃ni kulunkɛ

1 Ma beeↄ wàaipà píi, ↄ̃ ma zɛò kɛ́ gbɛ̃maaↄ ń ↄ̃nↄnaↄ ń ń yãkɛaↄ ku Lua ↄzĩɛ. Gbɛ̃e líↄ dↄ̃ tó wàↄ yeazi ge wàↄ zaagu gbɛzão. 2 Yã doũ mɛ́ lɛ́ gbɛ̃́pii dã́, gbɛ̃́ dↄ̀ↄdeↄ ń gbɛ̃́ dↄ̀ↄsaiↄ, gbɛ̃maaↄ ń gbɛ̃vãiↄ, gbɛ̃́ pↄ́ aa gbãlɛaↄ ń gbãlɛnsaiↄ, sa'onaↄ ń sa'onsaiↄ. Lá a dɛ ń gbɛ̃maao, màa a dɛ ń duunkɛnaↄ. Lá a dɛ ń gbɛ̃́ pↄ́ aaì mɛ wa sì ń Luaoↄ, màa a dɛ ń gbɛ̃́ pↄ́ aa a oa vĩa vĩↄ. 3 Yãvãi pↄ́ ì kɛ dṹniau píin kɛ: Yã doũ ì gbɛ̃́pii le. Vãi kↄ̃̀ gbɛ̃nazĩnaↄ sↄ̃u, mìsaiyã mɛ́ ì dↄaanɛ́, a gbɛa aaì ta gɛↄ guu. 4 Gↄↄ pↄ́ gbɛ̃́ bɛ̃́ɛ, ìↄ tãmaa vĩɛ. Baa se gbɛ̃ bɛ̃́ɛ sã̀ↄ nↄ̀ↄmusu gɛwa. 5 Gbɛ̃́ bɛ̃́ɛↄ dↄ̃ kɛ́ wa ga, gɛↄ sↄ̃ aa pↄe dↄ̃o. Aa àie vĩ lↄo, an yã́ a dↄ gbɛ̃egu lↄo. 6 An yea gbɛ̃́zi ń ń zaa gbɛ̃́guo ń ń dɛnlawɛɛlɛao gɛ̃̀zɛan we kↄ̀. An bàa aↄ kú ń yã́ pↄ́ lɛ́ kɛ dṹniauo bau lↄo. 7 Gɛ ǹ pↄble ń pↄnao, vɛ̃ɛmi ń yaalↄo, asa Lua n yãkɛapiↄ sáaukpà kↄ̀. 8 Ǹyↄ̃ ula pua daa gↄↄpii. Ńsu líↄ ku nísidↄↄa n miwa saio. 9 Dṹnia ble ń n na yenzideo n wɛ̃ni gii pↄ́ Lua kpàma dṹniau lɛ́u, asa n luakpaman we gↄↄ pↄ́ n isima gà ńlɛ kpá dṹniau. 10 Zĩ pↄ́ ń è n ↄkpàwà, mɛkpawà n gbãa lɛ́u, asa zĩ ge làasoo ge dↄ̃a ge ↄ̃nↄ ku bɛdau, gu pↄ́ ńlɛ táuo.

11 Má è dṹnia guu lↄ kɛ́

bakpaaĩbleaá kàsakasa yã́ɛ adoo,

zĩbleaá nɛgↄ̃nkɛyãɛ adoo,

pↄbleaá ↄ̃nↄyãɛ adoo,

àizɛɛ'eaá wɛzɛ̃yãɛ adoo,

na ń gbɛ̃́ↄá ladↄ̃yãɛ adoo,

asa gↄↄ vãi ń kìsiao ì gbɛ̃́pii leɛ,

12 mɛ́ gbɛ̃e gↄↄ pↄ́ vãi a a le dↄ̃o.

Lán kpↄ pↄ́ sì táalu guuwa,

lán bã pↄ́ fíi aà kũ̀wa,

màa gu ì dↄ gbɛ̃́ɛ vãivãi,

ì aà kũ kã́ndo.

Ɔ̃nↄ dɛ gbãaa

13 Ma ↄ̃nↄe taa è dṹniau, a yã́ ma kũ gbãa. 14 Wɛ̃́lɛ kú yãa a gbɛ̃́ↄ dasio, ↄ̃ kía gbãadee mↄ̀ lɛ́lɛiwa, à koezↄ̃̀i. 15 Gↄ̃ɛ taaside ↄ̃nↄnae ku wɛ̃́lɛpi guu, a fↄ̃ wɛ̃́lɛ bↄ ń a ↄ̃nↄo, ãma gbɛ̃e i aà yãdao. 16 Ɔ̃ ma mɛ̀ ↄ̃nↄ dɛ gbãaa, ãma wì saka taaside ↄ̃nↄuɛ, wìli aà yãdao.

17 Ɔ̃nↄna yã́ pↄ́ wà swãdↄ̀i niɛniɛ

maa dɛ sↄũↄ dↄaana zↄakaala.

18 Ɔ̃nↄ ì mↄ́ ń maao dɛ gↄ̃kɛbↄↄla,

ãma duunkɛna mɛ̀ndo ì yãmaa zↄ̃ↄ ↄ̃̀ↄkpaɛ.

<- Làasoode 8 Làasoode 10 ->