AMƆSI
Yã́ pↄ́ kú láɛ bee guuↄ
E wàↄ gɛ́ Yesu Kilisi ii wɛ̃̀ 760 Amↄsi bↄ̀ a bɛ wɛ̃́lɛu Tekoa, Yuda bùsuu, à gɛ̀ zↄ̃̀lɛ Bɛtɛli, gu pↄ́ Isaili bùsu sa'okĩi zↄ̃ↄ kuu. Wegↄ̃ↄ ãnabikɛkɛa bↄ̀ ń saɛ lán loupũnaawa.
Gↄↄ bee kí Yeloboaũ plaade dɛ Isaili bùsu kía ũ (787-747). Siliↄ lɛ́ zĩkańnↄ lↄo, ↄ̃ Isailiↄ ɛ̀a lɛ́ namable lↄ, ↄ̃ ãnabi Amↄsi mↄ̀ Lua gbɛ̃́piↄ midɛa yã́ pã̀lɛńgu. Gↄↄ bee bùsudepiↄ lɛ́ zĩkɛ lousisiyãↄwa maamaaɛ. Bↄ́yãi à bao pãsĩpi pã̀lɛńgui?
A maa wà to baade àↄ kú ń a laaio kpálɛa lá Lua ikoyã dìlɛwa, ãma gbãadeↄ lí wei gbɛ̃́ↄnɛo. Bee yã́i Lua ì zɛ ń gbãasaideↄ. Amↄsi yã́ pↄ́ tò a gↄ̃ waasokɛna ũ yã́pi musu ò (7-9), ↄ̃ wà aà yà Isaili bùsuu gↄ̃̀ↄgↄ̃ↄ (7.10-17).
Lɛɛ 1 e 2 zↄa pↄ́ Lua dↄ̀ Isailiↄwa ń bui pↄ́ liaańziↄ,
Lɛɛ 3 e 6 yã́ pↄ́ tò Lua ń a gbɛ̃́ↄ yã́ bↄ̀ kↄ̃ kpɛ,
Lɛɛ 7 e 9 wá gbá zɛ́ wà yã́ pↄ́ Amↄsi ò bↄkĩi dↄ̃. À wɛ́pungu'è gɛ̃n sↄo mɛ́ a yã́ dɛ yã́ pↄ́ Lua a ɛa mↄ kɛiↄ seelaↄ ũɛ.
Amↄsi waasopi ì to wà làasookɛ Lua yã́ bↄa dṹniaɛ bee yã́ kpɛwa píi. Ãnabi pↄ́ wà aà yàpi ì to wà làasookɛ Yesu yã́wa lↄ. Yesu yã́ i kↄ̃sɛ ń gbãadeↄ yã́oo, i kɛ ń gbãao no, ãma yã́ pↄ́ a òpi lɛ́ yã́ dafu dilɛwɛ̃ɛ dɛ Amↄsi pↄ́a!

Yã́ pↄ́ a bui pↄ́ liaa Isailiↄzi le

1 Tekoa sãdãnaↄ do Amↄsi yã́ pↄ́ a è Isailiↄ yã́ musun kɛ. Yã́ pↄ́ a èpi dↄaaa tↄↄlɛ lualuaaɛ wɛ̃̀ plaɛ. Gↄↄ bee Uzia dɛ Yudaↄ kía ũ[a] mɛ́ Yehoasi nɛ́ Yeloboaũ dɛ Isailiↄ kía ũ.[b] 2 À mɛ̀:

Dii lɛ́ bↄ Siↄna ń pũnaao,

àlɛ bↄ Yelusalɛũ ń palaa gbãao.[c]

Pↄdãnaↄ dã́dãkɛkĩiↄ lɛ́ gↄ̃ wɛ̃nannↄ,

Kaamɛli gbɛpↄlɛ lɛ́ giigaga.

3 Ma Dii ma mɛ̀,

Damasi bùsu tàaekɛ̀ gɛ̃n àaↄ̃,

a dɛ beea se,

ma pↄ a weemáo,

asa aa Galada bùsudeↄ gbɛ̃̀gbɛ̃ ń ɛ̃́ngoↄɛ.

4 Má tó tɛ́ fɛlɛ an kí Azaeli bɛwa,

i kũ aà nɛ́ Bɛnadada kpɛ́ gbãaↄwa.

5 Má Damasi bĩ́ibↄlɛ gba gbooɛ,

mí Avɛni guzulɛpi kía tↄ̀lↄzↄ̃,

gbɛ̃́ pↄ́ zↄ̃lɛ báawa Edɛnibɛpi,

wi tá ń Sili bùsudeↄ Kii zĩ̀zↄↄ ũ.

Ma Dii mámɛ má ò.

6 Ma Dii ma mɛ̀,

Gazadeↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Asa aa ma gbɛ̃́ↄ kũ̀kũ zĩ̀zↄↄ ũ píiɛ,

ↄ̃ aa ń ná Ɛdↄũↄnɛ ń ↄzĩ.

7 Má tó tɛ́ fɛlɛ Gaza bĩ́iwa,

i kũ a kpɛ́ gbãaↄwa.

8 Má Asedoda kía tↄ̀lↄzↄ̃

ń gbɛ̃́ pↄ́ zↄ̃lɛ báawa Asekelonio.

Má ↄsɛ mà Ɛkɛlonideↄ lɛ́,

e Filitɛ̃ kↄ̃na pↄ́ gↄ̃̀ weↄ gɛ midɛò.

Ma Dii Lua mámɛ má ò.

9 Ma Dii ma mɛ̀,

Tiideↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Asa aa ma gbɛ̃́ↄ kũ̀kũ zĩ̀zↄↄ ũ píiɛ,

ↄ̃ aa ń ná Ɛdↄũↄnɛ ń ↄzĩ.

Lɛdoũ pↄ́ aa kɛ̀ńnↄ i dↄńguo.

10 Má tó tɛ́ fɛlɛ Tii bĩ́iwa,

i kũ a kpɛ́ gbãaↄwa.

11 Ma Dii ma mɛ̀,

Ɛdↄũↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Aa pɛ̀lɛ ń daɛↄzi ń fɛ̃ndao,

aai gbɛ̃e wɛ̃nagwao.

Aa pↄkũmabↄ̀bↄmá zɛzɛsai,

an pↄ fɛ̃ańzi i kpálɛo.

12 Má tó tɛ́ fɛlɛ ń bùsu Temaniwa,

i kũ a mɛɛwia Bↄzɛla kpɛ́ gbãaↄwa.

13 Ma Dii ma mɛ̀,

Amↄniↄ tàaekɛ̀ gɛ̃n àaↄ̃,

a dɛ beea se,

ma pↄ a weemáo.

Aa Galada bùsu nↄsindeeↄ pùi,

kɛ́ aa ye ń bùsu kã́fĩ yã́i.

14 Má tɛsↄ̃ ń mɛɛwia Labawa,

i kũ a kpɛ́ gbãaↄwa.

Zĩkawii iↄ dↄ,

zàa'ĩan gbãa i fɛlɛńgu,

15 wi tá ń ń kíao zĩ̀zↄ ũ,

aàpi ń a ìwaↄ sãnu.

Ma Dii mámɛ má ò.

Amↄsi 2 ->