Roma 10

1 E dad flanekgu, yé too kayè i nawagu galwà i dademegu Dyu, na fakgisgu ale dnasal di Dwata. 2 Balù do, gadègu too ale mayè lmalò di Dwata, bay i klalòla, là fdàla dun di too glut tdò. 3 Là gadèla i kfagu Dwata mimò dad to tluh. Yé balingla gnamit i dale kfagu. Taman, là lmalò ale di kfagu Dwata mimò dad to tluh. 4 Du Krayst ta dmohò i uldin du fye i kdee ftoo, mgimò tluh di kanfe Dwata.

I kagalwà fakay gfun balù simto dun

5 Ani i sulat Mosis gablà di dad to mayè mgimò tluh fagu di kimenla i uldin, “Nè to mimen man i uldin, klonto lmalò dun.” 6 Bay ani man i Tnalù Dwata gablà di dad to mgimò tluh fagu di kaftoo, “Nang man nawam, simto i myak di langit du fye neben Krayst tufa?” 7 “Na nang man nawam, simto i tufa di Hadis du fye ntékan Krayst mdà di fati?” 8 Bay ani i manan, “Mdadong di ge i Tnalù Dwata du déé di salékam na di nawam.” Yé kayèan man, i Tnalù tdòmi gablà di kaftoo. 9 Galwà ge ku tulenam Dyisas i Amu, na fantoom mdà di nawam ta nték Dwata kenen di fati. 10 Du mdà di nawato i kaftooto, na yé ulêan ta tluh ato di kanfe Dwata na ta galwà ato du tulento i fantooto. 11 Du yé man di Tnalù Dwata, “I ftoo di kenen, là gsalan.” 12 I kdee glam dini, du landè gusahal i dad Dyu na i dad ise Dyu. Du i Dwata, Amu i kdee, kenen mlé kafye di kdee tamlo di kenen. 13 Du ani man di Tnalù i Dwata, “I kdee tamlo di dagit i Amu, galwà ale.”

14 Bay dét kibòla tamlo di kenen ku là ftoo ale? Na dét kibòla ftoo ku là lingela i Tnalù Dwata? Na dét kibòla lminge ku landè tamdò dun di dale? 15 Na dét kibò katdò i Tnalù Dwata ku landè mdek to tamdò? Man i Tnalù Dwata, “Too fye mite i dad to tamdò i Fye Tulen.” 16 Bay nun là dmawat i Fye Tulen, salngad i man Isaya, “Simto ftoo di tdòmi?” 17 Taman, yé gumdà i kaftoo di kaflinge i Fye Tulen fagu di katdò gablà ku Krayst.

18 Bay nun snalekgu. Glut kè, là lingela i tdò? Yé man i Tnalù Dwata ta lingela,

“Ta gafat di klamang banwe i talùla, na i tdòla.”

19 Ani lêgu snalek. Là kè galmabat i dad to Israél? Tmimel Mosis fagu di Tnalù Dwata, manan,

“Gnamitgu dad to là fakay matlo satu banwe du fye mafè nawayu dale, na fagu di kakdogu i dad to landè gnadè, nimògu i kalbutyu dale.”

20 Na là likò Isaya tmulen i man Dwata ani,

“I dad to là mngabal do, ta teenla agu. Ta fite agu di dad to là smalek gablà di do.”

21 Bay ani man Isaya fagu di Tnalù Dwata gablà di dad bel Israél,

“Kat du, sigigu mni di dad to là mimen na magéng ulu fye fdadong ale di do.”

<- Roma 9 Roma 11 ->