Hebere 8

O Yeesu lé ɓa yankarowà ɲúhṹso

1 Bìo wa le wa à bío ɓúenɓúen á bìo ɲúhṹ wi po bìo ká lé bìo kà: Ɓa yankarowà ɲúhṹso na bìo bía kà lé yìa á warɛ́n yú. O yòó kará ho wáayi le Dónbeenì na dà mu bìo ɓúenɓúen nín-tĩánì. 2 O wee sá mí yankaró tonló mu le *sòobá-lùe yi hã pɔ̃nsòni bùkú binbirì yi, hìa á nùpue yí tá, lé o Ɲúhṹso Dónbeenì míten tá ho. Nùpue yí tá hón. 3 Yankarowà ɲúhṹso lée yankarowà ɲúhṹso á léra, bèra a na ò o wé wé mu hãmu, à ya hã muiní na le Dónbeenì yi. Àwa, á warɛ́n yankarowà ɲúhṹso ɓɛ̀n mún ko ò o yí bìo ɓúi à hã lè le Dónbeenì. 4 O lá wi ho tá wán, se o yàá lá máa wé yankaro. Lé bìo ɓa ɓúi wi vó á wee hã le Dónbeenì làa bìo ó o *Mɔyiize làndá bòráa mu. 5 Bán yankarowà ɲúnása so tonló na ɓa wee sá lé ho binbirì so na wi ho wáayi ɓàn khã̀nkhã̀náamu. Mu bon, pã̀ahṹ na ó o Mɔyiize hĩ́a ko ò o ɓúaká tá hã pɔ̃nsòni bùkú yi, á le Dónbeenì bía nɔn wo yi: «Loń, wé mu ɓúenɓúen làa bìo á ĩ zéeníanáa mu nɔn foǹ le ɓúee wán.»[a] 6 Ká hã laà na kà wán ó o Yeesu wón le Dónbeenì kàràfáa ho tonló yi. Ho bìo ɲúhṹ wi làa sòobɛ́ɛ, lé bìo le páaníi na ó o bò le Dónbeenì lè ɓa nùpua pã̀ahṹ á sṹaaní sṹaaní dìo lá wi lè ho yahó, lé bìo á bìo le Dónbeenì dó mí ɲii le mí ì wé è na wɛn le páaníi mu yi bṹn sṹaaní bìo lè ho yahó.

Le Dónbeenì dó mi ɲii le mí ì bè le páaníi fĩnle

7 Ká le *páaníi na le Dónbeenì bò lè ho yahó á fĩ́anì lá mía yi se le lá máa bĩní máa bè páaníi ɓúi. 8 Ɛ̀ɛ ká lé bìo le Dónbeenì nìpomu wó khon làa de á nɔn le bíaráa bìo kà:

«Mi loń, lé ĩnɛ́n Ɲúhṹso Dónbeenì bía bìo kà:

Pã̀ahṹ ɓúi khíi dã, ká ĩ bè le páaníi fĩnle

là a *Isirayɛɛle nìpomu, là a *Zudaa zĩ-ɲúhṹ nìpomu.

9 Dén páaníi so á à wé mí dòn làa dìo á ĩ bò lè ɓàn ɓùaawa

pã̀ahṹ na á ĩ tò ɓa níi wán lóráa ho *Ezipite kɔ̃hṹ yi.

Bán yí bò bìo wa bía tò wán yi.

Lé bṹn te bìo á ĩ ɓɛ̀n mún pã́ ɓa día, lé ĩnɛ́n Ɲúhṹso bía mu.

10 Bìo kà mɔ́n le páaníi na á ĩnɛ́n Ɲúhṹso á à bè là a *Isirayɛɛle nìpomu lé dìo kà:

Ĩ ì wé á ɓa wé è leéka ĩ làndáwá bìo,

ĩ ì dé hã ɓa sĩa yi. Lé ĩnɛ́n Ɲúhṹso bía mu.

Ĩ ì wé ɓàn Dónbeenì,

á ɓarɛ́n ǹ wé ĩ nìpomu.

11 Nùpue máa bĩní máa kàrán mín za tàá mí ninza le ɓa tà ĩnɛ́n Ɲúhṹso bìo,

lé bìo ɓa ɓúenɓúen á à tà ĩ bìo,

à lá ɓa nì-kĩ́a yi lii ɓúe ɓa háyúwá yi.

12 Ĩ ì sɛ́n ɓa bè-kora á à día,

á máa bĩní máa leéka ɓa wékheró bìo hùúu.»[b]

13 Bìo le Dónbeenì wee bío le páaníi fĩnle bìo, bṹn wee zéení le le càtío le páaníi na bò lè ho yahó làa dà-kĩ́nle. À bìo lée bìo ɓɛ̀n hĩ́a kĩ́na, se mu ká ho vĩ́ló.

<- Hebere 7 Hebere 9 ->