Nita Kapiloho 12

A Kilakila na Hunu

1 Muri a kilakila vakaturutu i bele na hunu. A ngatavine i varaki na haro. A keva i tabuli polotano na vahana. I kubea a tama ni rata na hada i ravulu a polona i rua. 2 [~1~]I singou, i bolea a nimadihi, i haloho, a vuhuna i pahea a koma. 3 [~2~]Muri a kilakila tara i bele tabu na hunu. A masia a mata dagi i vururu! A mapana i polorua, a pelengana i ravulu. I kube na maka gina a tama hariki i polorua. 4 [~3~]A maka hada ni nagi na tabeke i tolu, lakea a kuna mata i kovo pasi a tabekena hada i taku, ri boru puru na malala. Ra mata iea, i tabuli na ngalana ngatavine, ra i pahea a koma. I davea a ngatavine ge poda, a vuhuna i ngaru ni kania a koma. 5 [~4~]Muri a ngatavine i podea a koma bakovi, ra viri ge matakari a tanga lobo na malala. Ge matakari ria na naro hateka, i manga a viri i matakari e huriki na lebo ni rata na aen. A ngatavine i poda, pali e tuna ni kini paru na limana, ni bole sike na Vure, na gula hariki vona. 6 Lakea a ngatavine i ha lakea na tabeke a Vure i kado puru pali vona, na tabeke i ngeki. I made vonga, ni gi matakari na parava ge 1,260.

E Satan Ni Voro Puru na Malala

7 [~5~]Muri a vabinga dagi i bele na hunu. E Mikael turana e huriki a agelo vona ri vaubi turana Mata Dagi, e huriki a agelo vona. A mata dagi turana e huriki a agelo vona, ri koli, 8 pali i uka ma ri gao, i uka ma ri mulangi, lakea ni tono tala ria na hunu. 9 [~6~]Lakea a Mata Dagi ni voro puru. Ra mata hosi ni gale a hanitu, o e Satan. Ra viri i tami e huriki lobo na malala. Ni voro puru na malala turana e huriki a agelo vona.

10 [~7~]Muri a longoa a lohona viri i gale dagi na hunu, i ta maea,

“Ngane a Vure i korimule hita pali. A nitora, a harikianga na Vure ne hita i bele pali.

A nitora na Kristo vona i bele pali,

a vuhuna ra viri i padi virihi bala e huriki e turane hita, ni voro puru pali.

Ra viri mona kuduvi i pesi na matana Vure, i padi virihi ria.

11 E huriki e turane hita ri mulangi vona pali

na darana Sipsip,

na ngava muholi ri vakalongo e huriki vona.

Ri mulangi a vuhuna i uka ma ri mangenge ni mate.

12 [~8~]I mavonga, mu vivi, mua e huriki mu made na hunu.

Pali mua e huriki mu made na malala, mu made na dari, bara mu bole a vuranga!

A hanitu i puru valai mai mua.

I madihi hateka a hatena,

a vuhuna i lohoka vona a parava vona i popote kunana i tabana.”

13 Na tahuna a Mata Dagi i matakilaka vona ni voro puru na malala, i vano, i valili vona a ngatavine, ra muga i podea a koma bakovi. 14 [~9~]Pali a ngatavine ni habi a karapana i rua, i manga a karapana loha dagi, ge bebe ha na Mata Dagi, ge lakea na tabeke i ngeki, na tabeke ni gi matakari ia vona na pida i tolu, a kalavana. 15 Lakea a mata i muta tala a naru, i tua lakea na ngatavine, ta ge vakapasiri ia vona. 16 Pali a malala i koria a ngatavine, i ngapanganga, i todoa a naru, ra i muta talea a mata. 17-18 [~10~]Muri a mata, i madihi hateka a hatena vona a ngatavine, lakea i vano, i vaubi turana e huriki e tuna ranga, re huriki ri longo mai a vinara na Vure, ri luhoi tora a ngava muholi ne Isu. A mata i vano, i pesi na lavu na dari.

<- Nita Kapiloho 11 Nita Kapiloho 13 ->