Navisip̃eiano 7

Atua naio bijauia burum̃ara taara na tomu nalo tai na abe kanano

1 Iorou ka vite nalo nei, nemial ka napano nailiano veri ajumolu ajua sudu veri na yetemeriba, aju ajukovio ka jegi veri napano m̃a ajum̃a amiuvuvu ea yetemeriba, ka rila na jegi nalo nei ajikia re bunu aiuvuvu ea tei, p̃eli ea borotano, p̃eli na mave ea buruiesi. 2 Karina, nemial nailiano dolu bereio, naio binimei bija tena aue tovo napano Atua na meul kanano ea kiano tomu nalo, mia naio jaluvo ea tivelinio na jegi uro binimei. Naio mijikia ka nailiano nalo veri nei, nalo abar moroano ka amijikia ala lelan borotano a amijikia ala lelan tei bunu, ana naio bio m̃ele banlo, berburelo ka ala re bunu titai. 3 Naio ber jibe nei, naio berinavo “Ee to, kamiu kuvila bulag re tei p̃eli borotano p̃eli buruiesi nalo, rivan riva rivokar bogo napano rodu tovo tai toa ea meriniano tomu na memedu nalo napano abe kiado Atua kanano.”

4-8 Ka bogo nei naruei nejikar nomijog ka napano aberial memedu kanalo mirano napano ajekarlo. Nalo na amoluo ea yati duelimo ba juo [12] na Israel, nalo abe yati nalo napano m̃a abar korobilo nalo sialo, naina be Yuta, Rupen, Gat, Asa, Naptali, Manase, Simion, Livai, Isaka, Sepiulan, Yoseve, a Beniamen. Naruei ea yati nalo nei abiniu, tai bokar tomu nalo menu duelimo ba juo [12,000] amoluo ea naio, mila na nalo abiniu abokar menu toromomou duelimo va veri ba veri [144,000].

Burum̃ara tiniobi dolu napano amiya kulum̃arauo na miuvu

9 Ana iorou kanio, nejiraravo ba naruei kamu ka miraku be burum̃ara tiniobi na tomu nalo, napano nalo miroano mia miroano, maka ajikia avulukulo, napano nalo na amiyotuba ea yati dolu nalo. Nalo naruei abe tomu na buruvenuo dolu nalo, bija kialo iliano kinkin nalo, naruei abinimei ajumolu ajukamu ea burum̃ara jobaro lu, napano nunu solbouo naio joaio. Nalo amiya kulum̃arauo novo na miuvu abiniu, a abar m̃ati burum̃al, 10 ana aju abio toru, aberinavo

“Kiado Atua jotano ea kiano jobaro lu,

naio ga, bija nunu solbouo,

naljuo abe burupati na ioruriano na kanado.”

11 Ana bija nalo na, nailiano nalo bunu ajumolu aju jeliviv ea jobaro lu, ana amijil bunu navagadeano nalo bija temeul veri, ana nalo bunu aminie abamenea kamu ka jobaro lu, amilotu ka Atua, 12 aberinavo

“Nao, be riano!

Ilivuiano nonovio, a miamoiano, a masouano, a sivaiano, a vameneano, a sikiliano, a moroano,

nalo nonovio abe kanado Atua kanano naio takurano ga,

mia tibe na toboto.

Ilivuiano ban Atua!”

13 Ana ka bogo na, navagadeano tai naio bika den kiniou, berinavo “Burum̃ara tiniobi nei napano amiya tena miuvu na, a jau komijikia abe kei nalo na, a jau komijikia ka nalo aju be abinimei na?”

14 [~1~]Ana kiniou neberinavo “Ii, maka nejikia, mia jau kobe toro na toru tai na vio nei, p̃eli jau komijikia kovio?”

Ana naio berdop̃e berinavo “Ierinio, nalo na naruei napano amieldulu ea bogo na burum̃ara jogvaiano nene. Mia kulum̃arauo nalo na m̃a amiya na, ajekon ka burukija na nunu solbouo nei, naruei abinimei amiuvu bo jibe ka na komialio na. 15 Nalo naruei, kialo im̃auano jibe nei, ber

‘Nalo ajukamu ea jobaro lu na Atua kanano,

legiano a bogiano ana amim̃au kanano joomo ea kunuano lu,

a naio napano jotano mave nei, naio mia rivitikarlo.

16 Mia maka bunu ajikia siserlo bereio,

a mia ajog re midou bereio,

m̃erenio maka rijikia rila bulaglo,

burum̃ara sebi mia tunu re bunu lo,

17 bior nunu solbouo napano naio jo iviso ea vio lu nene mave,

mia naio rivaganlo,

rivuru m̃arabo kalo avan ea burupati uei na meuliano,

ana mia Atua naio riolkon nono jogumiralo den miralo.’ ”

<- Navisip̃eiano 6 Navisip̃eiano 8 ->