Parpar ke Jon 12

Fifin turan Dregon

1 Ke nenge tara fakileng ka tapiek bae na kukulii i aragii: Nenge fifin i kilkiliis ini pisiih ma funiil awii na piklin iun keke ma bangbang kia ri tel u ini nenge sangful ini u e keltot. 2 Fifin ae i tian ma ka ngange fangungut, wara le fatat in fafang. 3 [~1~]Namih, nenge fakileng sabin ka tapiek na kukulii, i aragii: Nenge tara dregon melmelek ae ifit e paklu, ka sangful e kom lo ma ka fit e bangbang ken king na ifit e paklu. 4 [~2~]Ma kun dregon ae ka pis faluut itikii e uh tina ituul e uh na foron keltot tina bat una nanal. Ke dregon ae ka tipiek na matan fifin ae fatat in fafang, isi ik ien kalalik kia aunbiing in pang. 5 [~3~]Fifin ae ka fang nenge kalalik tamat ae in nagogon marmarsan falifu ini bis ae ri tel u ini aen. Ke fanpil ri ka sim pes kalalik ken fifin ae ubase usuf God ke una nian kiiskiis kia. 6 Fifin ae ka fin una sunbiil, na nenge falifu ae God ka fageges ta u sala, isi rik fofonoi lo aiwa na in tikii e arip ini wu e mar ma won e sangful e biing.

7 [~4~]Ke ka mel e tara fapaket bae na kukulii. Maikel turan foron angelo kia ri fapaket turan dregon, ke dregon turan foron angelo kia ri ka fapaket tura ri. 8 Isau le rakrakai ke dregon biil ifasi, pesu ri ka tel ufu turan foron angelo kia tinbae na kukulii. 9 [~5~]Ke ri ka lin fapu tara dregon ae. I e sii tinpakanini ae ri foteng u ini kaltu laulau, le Satan ae i lame fager fanu tikii la tina piklinbat. Ri ka lin fapu u turan foron angelo tikii kia tinbae na kukulii una piklinbat.

10 [~6~]Ke ia ka ongen kinen tikas i perek tinbae na kukulii aragii,

“Igii mang ta e fafaliu ke God kirer,

rakrakai kia

ke matanfuntih kia,

ke rakrakai ke Mesaia kia una nagogon.

Wara le ri ka lin fapu ta u e tom fatiu,

ae i tiu foron tualikrer la,

na mata God kirer na siat ke na wor.

11 Foron tualikrer ri ka fapu ta u

ini dawu Natun Sipsip

ke ini foron orek an fafamalal kiri.

Ma biil ri soke ini liu kiri,

isi rin met.

12 Pesu, kukulii ke gam ae gam liu lo,

gamen laes!

Isau le kiskam kanaka

usuf piklinbat ke palgantes,

wara le kaltu laulau ka pu ta unaismi!

I kut laulau e bala,

wara i usum le aunbiing kia

ka tukli mang.”

13 Ma aunbiing dregon ka usum mang le ri ka lin fapu ta u una piklinbat, ka fes fifin ae i fang ta kalalik tamat. 14 [~7~]Isau le ri ka ta iun papaun nenge tara manurai sing fifin ae, isi ik wof una falifu ae God ka fageges ta u sala na sunbiil, isi rik fofonoi lo aiwa koseng sii ae, na in tuul e bet ma tiga. 15 Ke sii ae ka kuek ufu dan arae dan sel tina ngusu, isi ik ringe ufu fifin ae. 16 Isau le nanal ka lupes fifin ae, ka pangang ma ka kiim tikii dan ae sii i kuek ufu ta tina ngusu. 17 Dregon ae ka kut laulau e bala lon fifin ae ke ka la isi fapaket turan fale berberat ken fifin ae. Ri fanu ae ri misuut la na foron nagogon ke God ma ri ka pose papte fafamalal ke Iesu. 18 Dregon ae i ti ta sau awii na kiin.

<- Parpar ke Jon 11 Parpar ke Jon 13 ->