2 Timoti 3

Fefe Ding em Kaneloke Sang te.

1 Timoti ku kilele kal kelolewka! Fefe ding mewso keloke ding kabalak e, ilum fian ding keloke te.[a] 2 Nimtew angom? Kaneloke kukuw kale i fein diwkuw gelewokoliw kasike:

I ikalem ibolow kuw fukunsomi,

tum win on kisol kulamin bete kuw ibolow fian kebomi,

ikalem wiin kuw daosomi,

ikalem sul kuw kebomi, mali kawtiw im wiin de mit da koyembomi,

auk so alew so im weng sakalaw keko, weng bo bo kebomi,

kulomin ibolow kuw kemokoliw kate, alwol keko, kalfong yemomin ibolow keyeminba kebomi,

Sunbin-Got em ayem eisneng beelo “Kanemoka!”, angeko, sakok kemokoliw te.

3 Kebomi, ikalem kaim atuk ilo ibolow duyeminba kebomi,

mali iso iti ken bin abin em kulomin deiw e feninba kebomi,

mali ilo weng miyemin weng bakayembomi,

ikalem kal wangweng kelomin ibolow banim kebomi,

silikmoyembomi,

ken kukuw elo ibolow kaim alele kolewbokoliw te.

4 Kelewbomi, ikalem akunum kumel ilo kiol kukuw keyeminba keko, fimdi famde kukuw kuw kukuyembomi,

fongate kuw sali sali unbe ki kuw kebomi,

ikalem fukunin e “Nu kunum falim atew kawtiw nute te!”, angeko, ikalem wiin dawsulemin kawtiw kebomi,

kawin kaleem kulomin kalfong ete kuw ibolow fukunbomi, Sunbin-Got elo ibolow fian dulewinba kelokoliw te.

5 Kebomeliwi, i kal dim ete kuw “Nu Sunbin-Got em angin keluwka!”, angbokoliw kate, im mutuk tem kel e, i Sunbin-Got em kiin dim e kiol keyemoke beem kitil e “Fein kai!”, danginba kelokoliw te.

Ku kanelom kanekabiliw kawiw biim mit mewso unemokolew te![~2~]

6 Mali kanekabiliw kawtiw bi kukuyemin kunum keko, mali ibolow kau angbiliw, baluw waneng im am unesomi, ilo kak keyembomi, biim ibolow fukunin e sok emdiw bingeko, ikalem mit yemde unakabiliw te. Kate sili sili ibolow kukuw so, ibolow danong kukuw so, kukuw beem mongom ete waneng bi ilum kuluko, ibolow tiaktiak kebiliwi, 7 im ibolow fian e “Nulo kukuyemina! Kukuyemina!”, angbiliw kate, i ki keko, kukuyembin fein beelo nam dolon keliw te. 8 Kukuyembiliw kunum bi Sanes so, Sambeles so[~3~], aso im Moses elo maka kelewsiliw emdiw keko, kukuyembin fein beelo maka kelewbiliw te. Ikalem ibolow fukunin e kilonsomi, kal dim e ken kiol kuw kebiliw kate, im fein ibolow em dem e deben nam emdiw te.[~4~] 9 Kebiliw kasike, sukum ding kuw bomeliwi, im dim deben be kawtol fitew kelei, Sanes so Sambeles so, aso im kanesiliw beemdiw, kawtiw alik alik i biim ibolow kau angbiliw be kilele atemeko, kal keko, dolon kelokoliw te.

Fol em Timoti elo Ibolow Yak Salewse em Weng te.

10 Nakunum Timoti kutaka! Nem kukuyemkemin kukuw e kukuyemkabiliw kunum biimdiw bate. Ku nelo dolon keko, kilele kal kenemselew te. Nem kukuyemin e, nem gelewkabi kukuw e, nem “Nono keko, deiw ete keloke yake!”, angeko, fukunbi e, nem fein ibolow e, nem ibolow nanbow bin e, nem ibolow fian dulew dulew kemin e, nem ilum toloke ding kabalak e, kinkindako, bin e, alik alik angom be ku kilele kal kebelew te. 11 Beemdiw, ku abiw mutuk fian alemsal Antiok so, Aikoniam so, Ilistala so, biim kasel im nelo nenomin keko, betbet sakik fian dunemsiliw bakati kilele dolon kebelew te. Kate Kamok Fian e nelo dokonemei, ilum beem deiw e bul gewsi goto kenemse te.[~5~] 12 Feinka! Nimin kunum waneng ite mak Kulais Yesus eso fewtokoko, “Nu em kiol kuw kunum waneng keluwka!”, angiw tewe, yenomin ilum sakik mak im dim fein telemoke te.[~6~] 13 Kate wa kawtiw so, fimdi famde kunum so, biim kanebiliw ibolow fukunin be “Ken kai!”, angakabe kate, Seten-Ataanim e im ibolow atin kuw kou keyemeko, dolo keyemkabe kasike, im ibolow fukunin e atin kuw teifulusomelei, i mali im kukuyemkabiliw weng kilikabiliw kawtiw bikati ibolow teifulu koyemkabiliw te.

14 Kakabiliw kate, kukalem kulo kalekemsiliw kunum waneng ilo kilele kal kebelew kasike, ku kal kelewete: Im kulo kukukemsiliw weng be “Fein weng te!”, angbomi, kitil keko, im kukukemsiliw be kilele aluwko, gelewbolewka! 15 Ku aul falkamin ke alenalew ding bakate, Sunbin-Got em kukuyemin ayem be kilele kilikemalew te. Keko beli, weng be kom ibolow fukunin e kilinin kekemei, ku Kulais Yesus elo “Fein kai!”, dangenalew kasike, Sunbin-Got e kom kuanomin deiw bul gewsi goto kelewko, finik so bin deiw kel mo kokemse te. 16 Feinka! Sunbin-Got e akalem fut ayem em weng alik alik beelo fukfuka dulewse kasike, em weng be aluwbamin so kekabe te. Em aluwbamin e kanekote:

Mak e kukuyem kemin e,

mak e nukalem sili sili ibolow e kaim dim da koyemin e,

mak e ken kukuw so wa kukuw so kiol kuw kalyemin e,

mak e Sunbin-Got em kiin dim e kiol kuw kukuw kakamin kukuyemin ete te.[~7~]

17 Kaneko kasike, Sunbin-Got em weng kale akalem kunum waneng nulo memen keembelei, nu ki keko, ken ati kukuw kuw alik alik angom be kilele aluwko, gelewemoluwka!

<- 2 Timoti 2 2 Timoti 4 ->