E da ilisu gasa da dagoi ba:sea amola ilisu da ili fidimu gogoleiba:le,
E da ilima gogolema:ne olofosu imunu.
37 Amasea, Hina Gode da Ea fi dunuma amane adole ba:mu,
“Amo gasa bagade ‘gode’ liligi dilia dafawaneyale dawa:i, amo da habila:?
38 Dilia da dilia gobele salasu sefe amo ili moma:ne i,
amola ilima waini hano moma:ne olei.
Ilia da wali dili fidima:ne hehenaia misunu da defea.
39 Na fawane da Godedafa. Eno ‘gode’ liligi huluane da ogogosu.
Na da medole legesu amola Na da esalusu iaha.
Na da fa:gisa amola Na da uhinisisa.
Na hawa: hamosu logo enoga hedofamu da hamedei.
40 - 41 Na da Gode Esala. Na da Na lobo amo Hebene amoga ligia gadole
amane sia:sa, Na hadigi gobihei Na da debesa.
Moloidafa hou Na da hamomu.
Na da Nama ha lai dunu dabemu
amola Nama higa:i dunu ilima se imunu.
42 Na dadi amoga da ilia maga:me bagade dialebeba:le, dadabimu.
Amola Na gegesu gobihei bagade
da nowa Nama gegesea amo medole legemu.
Na da nowama da Nama gegesea, ema hame asigimu.
Fa:gi hamoi dunu amola se iasu diasu hamosu dunu huluane da bogogia:mu.’
43[f]Fifi asi gala huluane! Dilia Hina Gode Ea Fi ilima nodoma:mu.
Nowa da ili medole legesea, E da ilima se iaha.
E da Ema ha lai dunu amo dabesa.
Amola Ea fi dunu ilia wadela:i hou gogolema:ne olofosa.”
44 Mousese amola Yosiua (Nane ea mano) da Isala:ili dunu huluane nabima:ne, amo gesami olelei.
Mousese ea Dagosu Sia:
45 Mousese da Gode Ea olelesu amo Isala:ili dunuma olelei dagosea, 46 e da amane sia:i, “Hamoma:ne sia:i na da wali eso dilima olelei amo huluane noga:le nabima. Dilia mano da Gode Ea olelesu amo mae fisili, noga:le fa:no bobogema:ne, amo sia: ilima bu olelema. 47 Amo olelesu da hamedei liligi hame. Ilia da dilia esalusudafa. Amo noga:le nabasea, dilia da ode bagohame Yodane Hano na:iyado bega: soge dilia gesowale fimu soge, amo ganodini esalumu.
48[g]Amo esoha Hina Gode da Mousesema amane sia:i, 49 “Di A:balime Goumiga gilisisu (Moua:be soge ganodini, Yeligou moilai bai bagade gadenene) amoga masa. Nibou Goumiba:le heda:le, Ga:ina:ne soge amo Na da Isala:ili dunuma iaha, amo ba:ma. 50 Dia ola Elane da Ho Goumia bogoi amo defele di da Nibou Goumia bogomu.
51 Bai ali da Isala:ili dunu huluane ba:ma:ne, Na Dio hame gaguia gadoi. Di da Meliba hano (Ga:idesie soge gadenene, wadela:i soge Sine ganodini) amoga esalea, dunu huluane ba:ma:ne Na Dio hame gaguia gadoi. 52 Di da sedagawane amo soge ba:mu, be soge amo Na da Isala:ili dunuma iaha, amo ganodini hame masunu,” Hina Gode da amane sia:i.