Mo꞉mo꞉do꞉ 48

Ya꞉kob eyo꞉ Manasa o꞉lia꞉ A꞉flam o꞉lia꞉yo꞉ nafale mesea꞉ki, Godemo꞉ towo꞉ salifa꞉

1 Ho꞉len nolo꞉ ta꞉ta꞉sa꞉ga꞉, Yosa꞉b eyo꞉ iyayo꞉ walaf da꞉laka꞉ a꞉la꞉da꞉dabiki, eyo꞉ inso꞉ Manasa o꞉lia꞉ A꞉flam o꞉lia꞉yo꞉ tililia꞉sa꞉ga꞉, Ya꞉kobo꞉ ba꞉ba꞉ni ane. 2 Yosa꞉bo꞉ mio꞉ka꞉ a꞉la꞉bo꞉ Ya꞉kobo꞉ da꞉da꞉ga꞉, e uwo꞉b amilo꞉ alifo꞉leno꞉ ha꞉sa ka halale dasilia꞉ga꞉ sen. 3-4 [~1~]Ya꞉kob eyo꞉ Yosa꞉bo꞉wo꞉ a꞉la꞉sio꞉, “Gode Halaido꞉lo꞉ A꞉labo꞉ e ko꞉lo꞉ Ka꞉ina꞉n hen amio꞉ Lus amisa꞉n a꞉namio꞉ nelo꞉wa handalota꞉ga꞉, ne halaido꞉ doma꞉ki sa꞉lakiyo꞉ a꞉la꞉sio꞉, ‘Gilo꞉ so꞉wa sa꞉la꞉la꞉i ha꞉nab a꞉no꞉ modo꞉ ko꞉lo꞉ fa꞉la꞉doma꞉ki ta꞉fa꞉no꞉ ko꞉lo꞉, geya a꞉la꞉ta꞉ga꞉yo꞉ so꞉lo꞉wo꞉ alan fa꞉la꞉doma꞉ib. A꞉la꞉ta꞉ga꞉ hen we gemo꞉wo꞉lo꞉, so꞉wa gilo꞉ sa꞉la꞉la꞉i ha꞉nab o꞉mo꞉wo꞉lo꞉ tambo dimiaki, gio꞉ ho꞉leno꞉ tambo biso꞉lo꞉ dowa꞉i ha꞉na꞉mela꞉ib.’ Gode eyo꞉ nemo꞉wo꞉ a꞉la꞉dinali sio꞉. 5 Ne Isib hen wiyo꞉ semo꞉mio꞉ amilo꞉ gilo꞉ so꞉wa a꞉la꞉ ko꞉lo꞉ Isibdo꞉ sa꞉la꞉li a꞉no꞉, ne dio꞉l. A꞉flam o꞉lia꞉ Manasa o꞉lia꞉yo꞉ ni so꞉wa Luben o꞉lia꞉ Simeon o꞉lia꞉ o꞉ngo꞉ doma꞉ib. 6 Ko꞉sega giyo꞉ a꞉la꞉ma꞉ fa꞉s amio꞉ so꞉wa nolo꞉ a꞉sa꞉la꞉lialega, so꞉wa a꞉no꞉ ga꞉no꞉le doma꞉ib ko꞉lo꞉, dabun nilo꞉ aloba꞉dakiyo꞉, iyo꞉ a꞉la꞉ma꞉ ha꞉ga iliki dia꞉ib. 7 [~2~]Ne Mesobotemia ta꞉ta꞉ga꞉, Ka꞉ina꞉n hen a꞉na ha꞉na꞉ni ha꞉nakiyo꞉, A꞉fla꞉ta amisa꞉n amio꞉ semo꞉ fa꞉la꞉dowo꞉wa, Lesol e a꞉na sowo꞉. E sowabikiyo꞉, Ne nofolo꞉wo꞉ alan dowa꞉sa꞉ga꞉, A꞉fla꞉talo꞉ ha꞉na꞉sen tog anib a꞉na dali alifa꞉. A꞉fla꞉ta amisa꞉n a꞉no꞉ o꞉go꞉ Ba꞉diliha꞉m a꞉la꞉sa꞉la꞉sen.” Ya꞉kob eyo꞉ a꞉la꞉sio꞉.

8 Yosa꞉ba꞉ so꞉wa a꞉la꞉ a꞉no꞉ Ya꞉kob eyo꞉ ba꞉da꞉ga꞉yo꞉ a꞉la꞉sio꞉, “So꞉wa we o꞉ba?” 9 Yosa꞉b eyo꞉ a꞉ma꞉la꞉yo꞉ a꞉la꞉sio꞉, “So꞉wa a꞉la꞉ we, ne wena sen amilo꞉ Godeya꞉lo꞉ nemo꞉lo꞉ dimiyo꞉ we.” A꞉la꞉sa꞉labiki Ya꞉kob eyo꞉ a꞉la꞉sio꞉, “Gi so꞉wa a꞉la꞉ko nafale mesea꞉ki, niyo꞉ Godemo꞉ dulugu sa꞉ma꞉nigo꞉l ko꞉lo꞉, nelo꞉wa tililia꞉ mena,” a꞉la꞉sio꞉. 10 Ho꞉len a꞉namio꞉ Isolael e anaso꞉ dowakiyo꞉, ene siyo꞉ funa꞉ dowaki mo꞉ba꞉ba꞉no꞉ dowo꞉. A꞉la꞉go꞉ko꞉lo꞉ Yosa꞉b eyo꞉ ene so꞉wa a꞉la꞉ a꞉no꞉ tililia꞉ga꞉, iyaya꞉ anib a꞉na ta꞉tabikiyo꞉, Isolael eyo꞉ a꞉la꞉ a꞉no꞉ fafula꞉fo꞉liki mimilo꞉. 11 Isolael eyo꞉ Yosa꞉bo꞉wo꞉ a꞉la꞉sio꞉, “Ne ge misio꞉ wa꞉kabiyo꞉ mo꞉ba꞉ba꞉no꞉ a꞉la꞉asulo꞉ ko꞉sega, Gode eyo꞉ ne asufa꞉ ko꞉lo꞉, o꞉go꞉ ge o꞉lia꞉ gi so꞉wa o꞉lia꞉yo꞉ misio꞉ bo꞉do꞉l.” 12 A꞉la꞉sa꞉labiki inso꞉ a꞉la꞉ Isolaela꞉ gul anib amilo꞉ sen a꞉no꞉ Yosa꞉b eyo꞉ gasilia꞉ga꞉ ha꞉la꞉ doba꞉da꞉ ta꞉ta꞉ga꞉, e iyayo꞉ wabudakiyo꞉, hena gulalu siliki misa꞉fu ali. 13 A꞉la꞉ta꞉ga꞉ Yosa꞉b eyo꞉ ene so꞉wa a꞉la꞉yo꞉ tililia꞉ ya꞉ga꞉, iyaya꞉ aniba kagama꞉ yakiyo꞉, A꞉flam e Isolaela꞉ dagi fo꞉fo꞉doloba꞉da꞉ ta꞉taki, Manasa e Isolaela꞉ dagi ilili doba꞉da꞉ ta꞉fo꞉. 14 Ko꞉sega Isolael eyo꞉ ene dagiyo꞉ wo꞉ida꞉le dimiakiyo꞉, dagi ililib a꞉no꞉ so꞉wa tif, A꞉flama꞉ misa꞉ya dia꞉taki, dagi fo꞉fo꞉dolobo꞉ so꞉wa wa꞉la꞉b, Manasaya꞉ misa꞉ya difa꞉. 15 A꞉la꞉dimida꞉sa꞉ga꞉ Isolael eyo꞉ Yosa꞉bo꞉ nafale mesea꞉ki, Godemo꞉ dulugu sa꞉laki a꞉la꞉sio꞉,

“Ni ma꞉mu Ablaham o꞉lia꞉ do Aisa꞉g o꞉lia꞉ma꞉lo꞉ kudu ha꞉na꞉seno꞉ Gode ge.

A꞉la꞉ta꞉ga꞉ ho꞉len nelo꞉ sa꞉la꞉lia a꞉la꞉ta꞉ga꞉ dowa꞉i mio꞉ wenamio꞉, nelo꞉ dinafalo꞉ bo꞉fo꞉lowa꞉seno꞉ Gode ge.

16 Hida꞉yo꞉wo꞉ nelo꞉wa fa꞉la꞉dowo꞉ amio꞉, ge ma꞉mula꞉ kalu o꞉ngo꞉ fa꞉la꞉dowaki, ne asuwa꞉ta꞉sen.

A꞉la꞉fo꞉ko꞉lo꞉ o꞉go꞉ Gode giyo꞉ so꞉wa a꞉la꞉ we asuwa꞉taki, nafale mesea꞉ki ta꞉ta꞉bi.

A꞉la꞉ta꞉ga꞉ ne ma꞉mu Ablahama꞉ wiyo꞉lo꞉, do Aisa꞉ga꞉ wiyo꞉lo꞉, ni wiyo꞉lo꞉ mo꞉sulu hamana꞉ki,

a꞉la꞉ma꞉ so꞉wa sa꞉la꞉la꞉i ha꞉na꞉lab a꞉ma꞉yo꞉lo꞉ henfelo꞉ wenamio꞉ modo꞉ fa꞉la꞉doma꞉ki ta꞉ta꞉bi.”

Isolael eyo꞉ a꞉la꞉dulugu sio꞉. 17-18 Yosa꞉b eyo꞉ iyaya꞉ dagi ililib ko꞉lo꞉ A꞉flama꞉ misa꞉ amilo꞉ dia꞉tab a꞉no꞉ ba꞉da꞉sa꞉ga꞉, e mo꞉beaki, iyaya꞉ dagi a꞉no꞉ Manasaya꞉ misa꞉ya a꞉dia꞉foma꞉ki a꞉na dia꞉ga꞉yo꞉, iyamo꞉wo꞉ a꞉la꞉sio꞉, “Do, giyo꞉ halayo꞉ a꞉la꞉bo꞉ dimida꞉so꞉bo. So꞉wa we wa꞉la꞉b ko꞉lo꞉ gi dagi ililiba꞉yo꞉ e misa꞉ wena dia꞉foma” a꞉la꞉sio꞉. 19 Ko꞉sega iyaya꞉yo꞉ Yosa꞉b elo꞉ to sa꞉lab a꞉no꞉ mo꞉da꞉daki, emo꞉wo꞉ a꞉la꞉sio꞉, “Ni so꞉wa, ne mo꞉wo꞉ asulufo꞉liki dimido꞉l. Wa꞉la꞉b so꞉wayo꞉lo꞉ alan dowaki, ene eso꞉lo꞉wo꞉lo꞉ alan fa꞉la꞉doma꞉ib. Ko꞉sega gi so꞉wa tif wema꞉ wiyo꞉ alan dowaki wa꞉la꞉b so꞉waya꞉ wiyo꞉ tininima꞉ib. A꞉la꞉ta꞉ga꞉ so꞉wa elo꞉ sa꞉la꞉la꞉i ha꞉nab a꞉no꞉lo꞉ mada modo꞉ ko꞉lo꞉ fa꞉la꞉dowa꞉i ha꞉na꞉ib.”

20 [~3~]A꞉la꞉ta꞉ga꞉ Isolael eyo꞉ a꞉la꞉yo꞉ Godemo꞉wo꞉ nafale mesea꞉kiyo꞉, towo꞉ a꞉la꞉dulugu sio꞉,

“Tif amio꞉ Isolael kaluka꞉isale iliyo꞉ kalu nolo꞉ nafale mesea꞉kiyo꞉ a꞉la꞉sa꞉ma꞉ib,

‘A꞉flam dia꞉ Manasa dia꞉mo꞉lo꞉ Godeya꞉lo꞉ nafa dimido꞉ o꞉leaumbo꞉, o꞉go꞉ gemo꞉wo꞉lo꞉ a꞉la꞉dimida꞉melea꞉ki asulab.’ ”

A꞉la꞉sa꞉lakiyo꞉ Isolael eyo꞉ A꞉flama꞉ wiyo꞉ iwalu dia꞉taki, Manasaya꞉ wiyo꞉ ha꞉ga difa꞉. 21 A꞉la꞉ta꞉ga꞉ Isolael eyo꞉ Yosa꞉bo꞉wo꞉ a꞉la꞉sio꞉, “Ge dabuma. Ne ko꞉na꞉ma soma꞉nigo꞉l, ko꞉sega Godeyo꞉ ge o꞉lia꞉ dofo꞉ ha꞉na꞉la꞉ga꞉yo꞉, ge ma꞉muwa꞉ hena a꞉ma꞉la꞉ tililia꞉ ha꞉na꞉ib. 22 Ni heno꞉ na꞉ so꞉wa imo꞉wo꞉ aloba꞉dakiyo꞉, hen heb nolo꞉lo꞉ gemo꞉wo꞉ a꞉dimia꞉no꞉. Tamin amio꞉ niyo꞉ da꞉ inso꞉ o꞉lia꞉ helebe o꞉lia꞉ma꞉ Amol kalu i o꞉lia꞉ buba꞉sa꞉ga꞉, Sekem hen nafa, misio꞉ anib doba꞉da꞉lo꞉ a꞉no꞉ a꞉na di ko꞉lo꞉, o꞉go꞉ hen heb a꞉no꞉ gemo꞉ dimio꞉l.” Ya꞉kob eyo꞉ a꞉la꞉sio꞉.

<- Mo꞉mo꞉do꞉ 47 Mo꞉mo꞉do꞉ 49 ->