1 Bodu wiiarobine Ela natuna Hoseiya, Isrel kana kiiwawo iyiibada raghanine, na Ahes natuna Hesekaiya ivikiiwawo da Jiuda kiiravidiye wiibada idaguni. 2 Bi kana bodu 25 na ivikiiwawo bi Jerusalem kamone bodu yadi 29 ivibada. Sinananaki na Abija, touna Jakaraiya natuna. 3 Bi yana berabera na rotomanidi Yawe God matane ware nosinanaki Deivid ibera, na naboni. 4 Hesekaiya kabepepa berodi gawaridi ivikouririghana, akima kabikabikuwayidi ivikasigiiyana bi Asera[a] kabepepina kiitupodi ivikasiyaraghana. Bi kate naghove waghata Mosis bronsma mota iberana[b] ikasigiigiini, basuna Isrel damdi noko motana noghosine, na insense siyagabugabuna.[c] Motana sikwatuveni da Nehusten. Na Hesekaiya, motana ikasigiigiini da pinipinimidi.

5 Hesekaiya, Yawe Isrel kana God ivitumaghanena kirakiiyeni. Getana meko Jiuda kiiwawona naghone bo kiiwawona murine da God iyitumaghaneni ware Hesekaiya ibera na naboni. 6 Bi Yawe God metagha iwona, na nonowa iyaberabera. Touna, Yawe God yana gwara Mosis iverenina ikabisisiredi. 7 Noko kiiravine na Yawe God, Hesekaiya iyagwabigwabiyeni bi yana bagibagi na wasina kawakawa. Bi Asiriya yadi kiiwawo igebodeni da isinighii bagibagiyenina. 8 Hesekaiya, Pilistain damdi igeiwaiyidi, nokona Jiuda kubure da inagho Gasa kwanatune bi kate kubura ririnagha kwanatudigha, meyagii gisigisidi da inagho kwanatu ghamaghamadi akimama sigari wiikenaviviredina.