Link to home pageLanguagesLink to all Bible versions on this site
49
Iakovo Mualusiꞌa ta ꞌOlu Vilevilesi

1 Xe Iakovo muavuti, la muꞌavaliꞌa ta ꞌolu sou mineꞌe noxou mukalusi sou muvikalaneꞌi,

“Ngataꞌolu ngaxalili no paꞌumelo mo eni avikalangengixu mii ane sou
uxali noxinge mo noxiꞌa ta ꞌiliꞌilinge mo ta xasixasinge iloꞌa
ta ꞌiluꞌilusungengi no voxovoxo ane uneneꞌe iliꞌi.
2 Ta ꞌalixeni, ngingi nganeꞌe ngapita mo ngalomu.
Ngalomu noxilo maminge Isilaeli.”

3 Xe mitaꞌolu mukalu, la anu musokou sou muvikalanu Luven tei,

“Luven, nini ꞌalixeni laposalaxu ane, eni xavileli ane nini.
Eni no mine xavileli ia epalaaneni.
Nini itema vile tatila misevile mo xavineni misevile kalumo.
4 Nini loxo lexa uꞌani la evile umomomo sou utalutaluxene uasi.
Ia umomomo sou nini naxali itema vile tila la ua,
xo nelai ngongie sema noxilo vile ualasie lexe Vila ngeai,
la nexomaulaleli la nepamaelaleli sou neꞌoxo ꞌilixo masua no luusilo.”

5 Xe mukalu la musuku mulai noxiꞌa Simeoni ilou Levi.

“Simeoni ilou Levi ne ngingi ta taumetali.
Ngingi ngalavusou ngaꞌoxo masuaneꞌi ta mitema sou ngaveꞌa
no anu mimii sou ꞌotoꞌoto noxinge.
6 Umomomo sou eni alai axolu no taingengi,
mo alai nengeꞌa taxolu no anu xolu pita noxinge sou vaivaikalasou mimii uasi,
xo ngingi laꞌiangenge la ngalavusou ngaveꞌa ta mitema,
xe loxo ngingi laꞌiangenge uasi ia ngaxoxoo lailaixesi,
la ngingi ngamulinu masaxa noxinge sou ngaxoxolasou
ta kau tavatavaꞌa vitavitanisi.
7 Tavaꞌu xo ngingi ngongou ta mitema sou laꞌia,
la tuꞌumaxu uxolu noxinge ngongou,
xo opongengi e ututulu palepalea sou laꞌia ne masua manina misevile.
Eni aveluneꞌi ta xasixasinge mo ta ꞌiluꞌilusungengi sou
ilai ixolu vaꞌavaꞌaxu no xalexalee lia ne Isilaeli
mo ilai ixolu no nixi noxiꞌa ta minemineꞌi mo sou xavineꞌi uasi.”

8 Muvikalaneꞌi ta tamei ne mukalu, la musuku mulai noxou Iuda.

“Iuda, nini ne ta vivine iꞌiti ualasine.
Ta uluameni ne ulai la nakapilaxaꞌa.
Ta viivine ꞌo ulai la ixolaꞌu tavaꞌa ka itulu no tavaꞌa voꞌuxu sou
itangatulu uluꞌe no talaxene sou itoxoneni.
9 [~1~]Iuda, nini ne, loxo laeoni ꞌolu. Nini xavineni misevile.
O! Iuda, ꞌalixeni. Nini loxo laeoni anu uvau xou mii sou uꞌou
ka ulivu uneꞌe sou uai no taasou seꞌisisi.
Umeximexi tavaꞌu ilou avolu ka ulivu sou uai no lia la.
Evile umomomo sou utulusou uasi xo iꞌume noxou.
10 Iuda ne, anu uxolu aloxo tatananu tuala vile,
mo utetelisou vilaxoxu ane sosovosou lexe anu tatananu tuala.
Ia tatananu tuala noxou manina uxali,
la anu usaxilaꞌa ta mitema no xalexalee tuatuala ukalusi.
11 Ovu uaini uleme tavuꞌalo la sou utaliꞌisou donkiiu,
la ulai usakii no ovu uaini aiinu mo utaliꞌisou oosiiu
la ulai usakii no anu uaini avolu laixe.
Xe uaini lexaxu tavuꞌalo misevile
la sou unoꞌu uaini lexaxu ane sou uꞌuinu tokolomou,
xe unoꞌu uaini lexaxu lauoinu sou uꞌuinu tolomuou laixe no anu.
12 Iou lavoꞌnu ne lauoinu uꞌokinu, xo uiexu uaini lexaxu tavuꞌalo.
Anaxu ilanu ne ukea uꞌokinu, xo uiexu kau susu tavuꞌalo.”

13 Xe muavuti la muvikalanu Sevulon.

“Sevulon ne ulai la uxolu no luaki paꞌumolu.
Xalee tuala ane anu ulai uxolu no anu ne,
luaki laluꞌuxu mo lautuxu lailaixe sou lasilasipi uꞌuna utulu no anu.
Pilixasou liaxu ulai utalo ane ne Saidoni.”

14 Muvivikalanu Sevulon aloxo ne mukalu la musuku mulai sou muvikalanu Isikali.

“Isikali ne anu xaviinu loxo donki,
utavule tavuevule ia utalupexa sou umaꞌila.
15 Ia lexe umaisou tilovolovo sou lexe lailaixe mo lexe lialiaxu kalumo ne lailaixe,
la utangatulu uluꞌelai sou ususunu laxasou sou utavulenu tavuevule.
Xe ipalupalusou sou uxaxai uꞌokinu.
16 Xe Den ne, anu ulai la anu itema vile tila sou usaxilaꞌa ta mitema noxou sou
ulosieixu ꞌilixo ane mulapu sou imulinu.
Ta mitema noxou ne, ulai la aneꞌi aloxo aneꞌi ta mata ne Isilaeli ane seꞌi.
17 Den ulai la, anu loxo sinana veveeni uai no voteꞌi paꞌumolu.
Sinana veveenu vile masua manina no paꞌumolu voteꞌi.
Oosi uiave umulinu voteꞌi la, ungaasou tavaꞌu uluꞌu
la sou uleanu tatananu e mutelo noxou ne ulai iliꞌi.
18 ‘IAUE, eni axoomaieni sou napamaulileli.’ ”

19 Xe muavuti la muvikalanu Xado.

“Xado ne ulai iliꞌi la ta mitema sou pakali ilooxu sou ivau.
Ia anu uxiu ulai noxiꞌa sou umulineꞌi mo uveꞌaveꞌa.
20 Aselu ne, ulai la liaxu uxalixu laꞌilai lovolovoxu lailaixe misevile.
Anu uxutuxu laꞌilaili tumaꞌu mo tuꞌaxu lailaixe loxo tatananu tuala laꞌilalixu.
21 Napitali ne ulai la anu loxo mee.
Iꞌitalonu la uxixaoxao no anu masaxa noxousi.
Xe uxalixaꞌa ta ꞌolu la ta lailaixe misevile.”

22 Xe musuku mulai noxou ꞌolu Iosepu la muvikala aloxo ꞌo,

“Iosepu nini ovu uaini vile ne neneꞌaxu lailaixe misevile.
Ovu uaini ane ne, uleme no paꞌumolu lexa luuxu uopuopu utetelo no anu.
Ukalakala avoavolu utelo umulinu tani kakapisou.
23 Ta uluameni ixaline la ivene no anu tavi.
ꞌOtoꞌoto ane ne ꞌoluꞌolu uasi.
24 Ia nini Iosepu pasikomeni ne utalivimi uxolu aloxo ne xo Lataua noxilo,
eni Iakovo anu ulosine xavi. Avone ne pekiaꞌu misevile.
Lataua ane ne, anu usaxisaxilaꞌa ta Isilaeli,
mo kulu noxiꞌa sou italume no anu.
25 Anu Lataua noxilo, eni mamine Iakovo mo anu Lataua xaviinu misevile.
Anusi ualusine no anu laꞌiua molu teitexi no loxotolo,
mo lexa molu no lia tanu, mo ualusine sou napalaaneꞌi ta ꞌiline tavuꞌalo.
26 Ualusine sou nini mii piena.
Alualu noxilo, eni mamine ne,
anu mutila musuku mo uvaꞌusou xii laxalaxaꞌilu ne ukalusi,
mo mutila no anu mimii lailaixe e ta xasixasilo minoꞌu sou
mimuxaxu no taataasiꞌa tatei.
Alualu latala ne ulai iliꞌi la uxali noxine nini Iosepu manina no ieni
nini tila no taineꞌi ta viivine.
27 Beniamini ne anu aꞌaa vova toxoxaꞌa.
No kakau xe no ꞌoloꞌolovoxo, anu uꞌiꞌa ta mii anu muveꞌa mo ukalipalaꞌaneꞌi.”

28 Aneꞌi ta mitema ane ne, aneꞌi mata mavulovexa mo mulelia tamei noxiꞌa ta Isilaeli ane. Mamiꞌa vaivaikalau sou mualusiꞌa no anu ane telomusou mo muneꞌe mutalo noxou Beniamini. Alualu ane anu mualusiꞌa no anu ne, mumomomo manina no anu maulixaꞌa vilevilesi.

Iakovo Musoli

29 Xe muavuti la mupelaꞌa aloxo ꞌo, “Eni asou alai noxiꞌa ta milemileli tapita no tuala sou soli. La sou emasaxa lexe ngaꞌasixo ane ta xasixasilo miai no anu. Miꞌasixaꞌa no taxa no lia noxou Epulon anu itemasie Keti. 30 [~2~]Taxa ane ne, muxolu no xalee lia ne Makapela ꞌalai ne Mamure, no xalee lia tila ne Kanani. Avalaamu mulotonu taxa ane ne noxou Epulon itemasie Keti no lia xalee ane ne kalumo. 31 [~3~]Miꞌasixu Avalaamu ilee semau Sala mo Aisaki ilee semau Liveka mo eni eꞌasixe Lea kalumo ane ꞌolele. 32 Lia xalee ane ne, mo taxa sou taꞌasixaꞌa ta mitema no anu ne, Avalaamu muloto noxiꞌa ta Keti.”

33 [~4~]Xe Iakovo mupelaꞌa ta ꞌolu aloxo ne xe mukalu, la sou mutelailixu tavaꞌu no luusou sou muai muluꞌelai, xe musuxulaꞌe alaxu vilesisi ne la, musoli. La mulai sou iloꞌa ta minuminu ane misoli tei mipita no tuala noxiꞌa ta mitema sou soli.

<- TAVAꞌU 48TAVAꞌU 50 ->