REVELATION 7

Angel-ala Altjirraka imparra arrarnaka, relha 144,000-aka

1 Nhanhiperra atha angel tharramatharra araka. Nyinta yirrara marntamarntala itnaka, arrpunha ekngarra marntamarntala, arrpunha ntakarra marntamarntala, arrpunha altorla marntamarntala. Angel nhanha etna wurinya tharramatharra etnanha errkurlanaka, wurinyala itja inthorra warnitjinanga, alhala paka, kwatja laiyala paka, irnala paka. 2 Angel nhanha etnanhataka Altjirrala turnakala alha nhanha kornilitjika, kwatja laiya turta. Kurunga atha angel arrpunha araka ekngarranga rratentjimanga, katha nhanga lirnngala rratamanga inthorra. Angel nhanha era Altjirra etatha ekura imparra iltjala tnyinaka. Erantama angel tharramatharra etnaka intarra inthorra ilkaka. 3 “Anmarrkai! Rrangkarra itjantema alha nhanha, kwatja laiya paka, irna ntjarra paka kornilitjika. Atha arrkurla Altjirraka imparra arrarnitjika, Altjirra nurnakanhaka kurtungurla ntjarraka urlaka.”

4 Relha nthakintjakantama angel era Altjirraka imparra arrarnaka? Atha wuka etna 144,000 nakala, Israel-aka ramarama ingkarrakanga urrarakala.

5 Judah-aka ramaramanga 12,000.

Reuben-aka ramaramanga 12,000.

Gad-aka ramaramanga 12,000.

6 Asher-aka ramaramanga 12,000.

Naphtali-aka ramaramanga 12,000.

Manasseh-aka ramaramanga 12,000.

7 Simeon-aka ramaramanga 12,000.

Levi-aka ramaramanga 12,000.

Issachar-aka ramaramanga 12,000.

8 Zebulun-aka ramaramanga 12,000.

Joseph-aka ramaramanga 12,000.

Benjamin-aka ramaramanga 12,000.

Worla kngarra era mantarra tjulkurakarta

9 Nhanhiperra atha worla kngarra inthorrantama araka. Etnanha yarna count-emilaka, etna ntjarra inthorra namanga. Etna pmararrpaninhanga pitjikala, ramarama twetakatwetanga turta. Angkatja etnakanha turta twetakatweta naka. Etna chair kngarritjanga urlarra, Lamb-anga urlarra turta itnaka, mantarra tjulkuraka ekarralhakala. Iltja etnakanhala etna rrangkia walya tnyinaka. 10 Etnantama intarra inthorra ilkaka,

“Altjirra nurnaka, erala chair

kngarritjala narlanama,

Lamb era turta,

eratharranta relhanha irrpalthala

tangkalhelama.”

11 Angel ingkarraka chair kngarritjanga, kngarripata ntjarranga, tnontha ngerra marra ntjarranga turta kaarntakaarntala itnaka. Etnantama mparalela arrarnalhamala, urla etnakanhala arna mpaaraka. Etnantama Altjirranha tnantjaka, 12 lakinha angkamala,

“Amen! Altjirra nurnaka makalaria nama,

inangkarla inthorra, ekarlta inthorra

turta.

Erinha relha ingkarrakala ngampakala

tnantjitjika, dangkilitjika turta. Amen.”

13 Kngarripata nyintalantama yinganha pmarraka, “Ngunhama relha nhanha ntjarra, etnala mantarra tjulkuraka ekarralhakala? Unta paka kaltja nthanhanga etna pitjikala?”

14 Yinga pula angkaka, “Itornka nukai, untanta kunha kaltja.”

Erantama yinganha ilaka, “Relha nhanha ntjarra kunha alhala kngarra nyingalauwukala. Etna turta mantarra etnakanha tjulkurilakala, mantarra etnakanha Lamb-aka alhwala ilkngimala.

15 Lakinhanga etna Altjirraka chair

kngarritjanga kutalantama itnama.

Etna turta arltala pa ingula Altjirraka

urrkurrkintja nama, temple ekuranhala.

Erala chair kngarritjala narlanama,

era turta etnakalela kuterritjina.

16 Etna itja wotha ngaiyalerritjina,

angkathalerritjina paka.

Lirnngala, wumpiala paka etnanha itja wotha

mputjina.

17 Lamb era, erala chair kngarritjanga kutala

itnamanga, era etnanha ntarntaritjina.

Era etnanha pentja marrurna rretjingitjina.

Etna pentja nhanhanga kwatja ntjumanga,

etna ngampakala etatha nitjina.

Altjirrala turta alkngoltja ingkarraka alknga

etnakanhanga ilkngitjina.”

<- REVELATION 6 REVELATION 8 ->