Link to home pageLanguagesLink to all Bible versions on this site
5
Jon Natik Onok Buk Douk Shaweshigok Iri

1 Aria eik Jon yatik anudok arman douk natem enyudok debeinyi wagitur iri nasuhw onok buk ananin yopunyi rogur. Okwudok buk okwok douk kabi anap roupi shup um. Okwok douk shadareshok aria showeshigok. Aria baraen shenyem nyape numunik um kwani aduk shopunek. Aria showeshigok 7-poreih shakwu kendelis gris. 2 Aria eik yatik enen dodogowinyi ensel nyape nyeyagwreh debeg nyakri, “Meinyi arpen douk yopin abom aria wosik um nyubahiguk asudok kendelis gris douk showeshik okwudok buk um aria nyukweshihok?” 3 Aria madae shutik enen atin arpen nyape iruhw heven iri o agundok atap iri o shakamum agundok atap iri douk ta wosik um nyukweshih okwudok buk aria nyutik numunik um iri. 4 Aria douk yatik um madae shuparug enen arpen uwe douk wosik um nyukweshih okwudok buk aria nyutik numunik um iri. Douk namudok aria eik yereh debeg. 5 Aria anan um amudok 24-poreim debeimi nanaki nakripe nakri, “Kwamnek! Nyak mare nyureh! Anan arman um apudok awirop nyeigurip um Juda iri douk nakitak Devit ananip awirop iri douk dodogowin kabi enen wanohwinyi mahin nyeigurinyum laion iri. Anan douk neyotu dodogowin atun nenek wanohw nabo yoweishi inahos shani ihishmorim ananish horim shabuhuk. Douk namudok aria anan douk dodogowin aria wosik um nubahiguk asudok 7-poreis kendelis gris douk showeshik okwudok buk um aria nukweshihok.”

Jon Natik Enen Nugaen Sipsip

6 Aria yatigu enen Nugaen Sipsip nyeyotu hurukatin um enyudok debeinyi wagitur. Aria eshudok nubatish dodogowishi douk mishish shoresh iri shani amudok 24-poreim debeimi sheyotu shersharih enyudok Nugaen Sipsip. Enyen nyubrug gwapenyen kabi shaen nyagok iri um. Enyen 7-poreiruh shuwaruh hakih enyenyig barag aria 7-poreis nabes sapenyen. Asudok nabes douk sakri wobuwobren baraen um Iruhin ananish 7-poreish mishish[a] douk anan neshopokesh shanak ihigunmorim um agundok atap iri. 7 Aria enyudok Nugaen Sipsip nyanaki nyatrun okwudok buk anudok douk nasuok yopunyi rogur aria nape debeinyi wagitur iri. 8 Douk enyen nyatrunok aria eshudok nubatish dodogowishi douk mishish shoresh iri shani amudok 24-poreim debeimi shabuh shaduk ohrubus shakus hurukatin um Nugaen Sipsip aria shenek lotumen. Aria ihim-morim amudok debeimi hasuhw sisigish atish enesh eshudok kabi gitahas um shani anas dis douk shenekas gol iri. Asudok dis douk shuknis um enyudok paura douk enyenyigus nyugus seisik wosik iri. Enyudok paura douk nyakri wobuwobren baraen um beten douk Iruhin ananish arpesh shape shenekan iri. 9 Aria eshesh shape sheyarub onohw namuhwi awehw shakri,

“Nyak douk yopuni abom aria wosik um nyutrun okwudok buk
aria nyukweshih ihismorim kendelis gris douk showeshigok um.
Um maresh? Eshesh shaen nyagok
aria nyakibor owishibor batourak bator
ihismorim awirosish arpesh
aria bakweshihesh shape Iruhin ananish atish.
Eshesh douk shape ihismorim sisigis debeisi awiros
aria sheneyagwreh sabainyi kupainyi baraen iri.
Eshesh douk sabairuhi sisigiruh yegeshiweruh-ish arpesh douk shape ihirubmorim debeirubi warub nahobigos
abudok amnab agundok atap iri.
10 Nyak douk nyenekam hatogur pris douk hape henek ofa um
eneshenesh eshudok hako apakin Debeini Iruhin iri.
Aria anan ta nupe Debeini nusuhw merikw-umesh
aria kweipon eshesh ta shupe debeishi
kabi douk debeimi king-omi
aria shusuhw merik um ihishmorim arpesh shape agundok atap iri.”
Eshesh Shatuk Nugaen Sipsip Enyenyin Nyeigur Nyato Iruhw

11 Aria wata shopunek yatrugunugu aria yemneku eshudok sabaishi Iruhin ananish enselahos esheshih meh. Shadarehesh um douk shatogur sabaishi abom. Sabaibi tausenab bani sabaibi milionab. Eshudok sabaishi enselahos sheyotu shersharih enyudok debeinyi wagitur nyani eshudok nubatish dodogowishi douk mishish shoresh iri shani amudok 24-poreim debeimi armam. 12 Aria eshudok enselahos sheyarub debeg shakri,

“Enyudok Nugaen Sipsip douk seiwok shaen nyagok iri douk yopunyi abom.
Douk namudok aria enyen douk wosik um nyirao debeinyi nyeigur
nyuni utabor buni eneshenesh yopishi eshudok
shuni debeinyi dodog.
Aria shopunek enyen douk wosik um nyurao yopinyi saki
aria wosik um apak mutuk enyenyin atin nyeigur nyuto iruhw.
Aria enyen douk wosik um apak munadudareh-umen abom aria mutuk enyenyin atin nyeigur nyuto iruhw
aria munek lotumen.”

13 Aria eik yemnek ihishmorim eshudok douk Iruhin nenekesh shape iruhw atap iri shani eshudok douk shape shakam agundok atap iri shani ihishmorim shape shakam debeigwi youg iri shape sheyarub onohw awehw shakri,

“Apak makri ihishmorim eneshenesh eshudok shunadudareh um
anudok nape debeinyi wagitur iri nini Nugaen Sipsip.
Aria shutuk esheshish nyeiguhw shuto iruhw
aria shunek lotumesh ihih nyumneh.
Aria makri ihinyumorim debeinyi dodog nyuni agundok natrugun aria nape dodogowini um shupe um
eshesh biyesh ihih nyumneh!”

14 Aria eshudok nubatish dodogowishi douk mishish shoresh iri shakri, “Adur atin!” Aria amudok 24-poreim debeimi armam habuh hoduk ohrubus atap aria henek lotu um Iruhin nani Nugaen Sipsip.

<- REVELESEN 4REVELESEN 6 ->