ROM 10

Esis Israel ina sofaꞌ waf buꞌunai Godi, owaꞌ

1 Alupipei, okom aeꞌanai naꞌiam endilisi andaꞌ betena anona nemaf God nofaꞌ esis Israel nefaꞌas nokwahomas waf aonai sotanimani. 2 Aeꞌ egawa esis andeandeꞌ eaꞌ aꞌi amama. Esis ukup mohafel endilisi sandaꞌ maol laꞌifinai ma sila God, eaꞌ esis ina sogawa basef Godi endilisimi andeandeꞌ, owaꞌ. 3-4 Esis ukup mahamahasa waf God nandaꞌanai ma niꞌi apeꞌ epes buꞌupai. Eaꞌ sandaꞌam sawalapa waf buꞌunai asasinai atona saila miꞌuli anama God fowaꞌ nasoꞌ Mosesanai. Eaꞌ esis ina safeꞌ owina Goda naꞌi apeꞌ epes buꞌupai, owaꞌ. Eaꞌ Krais nafiꞌi nataga eaꞌ. Amama atom deiꞌ apeꞌ ina ataꞌ mape owina miꞌuli anama, owaꞌ. Anan nafiꞌi nawalapa amam nematawa emi egafis sembaleꞌefa basef Ananimi deiꞌ God nofalas naꞌi esis amam nematawa boꞌwes andeandeꞌ.

5 Waf anama epen naila miꞌuli anama ma God naꞌi anan buꞌunai, Moses fowaꞌ gani naꞌiam naꞌama naꞌi,

“Emi egafis saila waf anama hianai andeandeꞌ hiꞌalana, anona nemaf esis sefaꞌ ambagof namumi ma saila miꞌuli anama.”

6 Eaꞌ waf emi egafis sembaleꞌefa God saꞌi Anan buꞌunai, waf anama naꞌiam naꞌama naꞌi,

“Ipeꞌ owaꞌ ukup miꞌi opalef ipeꞌimi miꞌi, ‘Anona nemaf emi egalin nefeꞌ nilata heven?’ ” ma nihaliꞌ Krais nisilaꞌi, owaꞌ.

7 Eaꞌ ipeꞌ owaꞌ piꞌiam naꞌama piꞌi, “Anona nemaf emi egalin nefeꞌ newala wambel epes sagaꞌi?” nihaliꞌ Krais notanimani. Naꞌama wapotiꞌ owaꞌ.

8 Eaꞌ basef amama ma epes sembaleꞌefa God naꞌi esis boꞌwes maꞌi main? Basef amama maꞌi naꞌama maꞌi,

“Basef amama mape felefeleꞌma ipeꞌ, mape maloguf maloma opalef ipeꞌimi.”

Basef apeꞌ mombaleꞌam mawalapam maꞌiam amama. 9 Iꞌi ipeꞌ pewalapa basef amama alihim piꞌi Jisas anan Dembinai ma pembaleꞌefa God opalef ipeꞌimi piꞌi God nafelona nohafel hiꞌagif wapotiꞌ, anona nemaf God nofaꞌai ipeꞌ wapotiꞌ pitanimani. 10 Deiꞌ main, apeꞌ mombaleꞌef opalef apeꞌimi God naꞌi apeꞌ amam nematawa mataga buꞌupai andeandeꞌ eaꞌ. Eaꞌ mawalapa baleꞌef apeꞌinai malogof apeꞌimi God nofaꞌapa nokwahomapa waf aonai motanimani.

11 Amama siꞌi Baibel naꞌi,

“Emi egafis sembaleꞌefa anani, anona nemaf epes isima ina ukup aom, owaꞌ.”

12 Esis Juda saloma isima owaꞌ Judaisi eaꞌ naꞌama etin, God Anan Dembinai atotona apeꞌ hiapai. Eaꞌ anan nagiambamapa naseꞌapa waf buꞌunai etina emi egafis sofalona, 13 siꞌi Baibel naꞌi,

“Emi egafis saꞌi agel Dembinai ma sofalona, nofaꞌas nokwahomas waf aonai sotanimani.”

14 Eaꞌ iꞌi esis owaꞌ seambaleꞌefa anan anona nemaf sofalana sogawana siꞌimama? Owaꞌetin. Eaꞌ esis iꞌi owaꞌ seameꞌ basefa Anan, nambimb sombaleꞌefana siꞌimama? Eaꞌ iꞌi enis owaꞌ sieꞌipasa basef esis, deiꞌ sogawam siꞌimama? Owaꞌetin. 15 Iꞌi God owaꞌ nosapaꞌi amam amama, deiꞌ amam mefeꞌ mowalapam miꞌimama? Owaꞌetin. Siꞌi Baibel naꞌi naꞌama naꞌi,

“Ahalomafa! Maol anama epes sofaꞌi basef buꞌwami aeꞌami sifiꞌi, anama buꞌunai endilisi!”

Esis Israel hiesi ina saila basef buꞌwami Godi, owaꞌ

16 Ina Israel hiesi saila basef amama buꞌwami Godi, owaꞌetin. Fowaꞌ profet anama Aisaia naꞌi naꞌama naꞌi,

“Dembinai, anona nemaf emi egafis sembaleꞌef basef amama esis semeꞌama afaꞌ? Owaꞌetin.”

17 Apeꞌ mogawa, apeꞌ hiapai mameꞌ basef buꞌwami eaꞌ amama atom mafela baleꞌef apeꞌinai. Eaꞌ deiꞌ basef amama mataga maina eaf? Amama mataga amam mawalapa basef Kraisi atom. 18 Eaꞌ aeꞌ aꞌiam naꞌama. Aꞌi esis ina sameꞌ basef amama buꞌwami? Owaꞌetin. Esis sameꞌam eaꞌ, siꞌi Baibel naꞌi,

“Basef mafeꞌ mandahama wambel hiagoma mafeꞌagon hiꞌalagon.”

19 Aeꞌ etambel aꞌiam. Aꞌi esis Israel sogawa basef amama buꞌwami o owaꞌ? Owaꞌetin. Esis sogawa. Moses naliꞌ naꞌi basef amama naꞌi,

“God naꞌipa esis Israel naꞌi, ‘Aeꞌ efaꞌ enis amam nematawa falafisi, esis ina epes laꞌifis sataga epes endilisisi, owaꞌ. Aeꞌ efaꞌasi igiambamas falafis anona nemaf ipeꞌ kowalepama waf buꞌunai aeꞌ endaꞌmasana esis. Aeꞌ efaꞌai epes isima owaꞌ seagawa aeꞌi eaꞌ anona nemaf ipeꞌ pitilis ukup aomas.’ ”

20 Aisaia ina umbamahana ma naꞌiam nawalapam, owaꞌetin. Anan nawalapam naꞌiam alihim naꞌama naꞌi,

“Epes isima owaꞌ seagalopa aeꞌ, deiꞌ satolowe eaꞌ. Epes isima owaꞌ seahaliꞌ aeꞌ, deiꞌ ataga andawalapa esis.”

21 Eaꞌ esis Israel anan ina naꞌipas naꞌama, owaꞌ. Anan naꞌipas anom basef naꞌi,

“God naꞌi, ‘Epes isima satopaꞌ basef sosambala basefi. Nogota launai endilisi aeꞌ efalas andaꞌ lagof iwaumasi. Owaꞌetin.’ ”

<- ROM 9 ROM 11 ->