HIBRU 8

Jisas nape Dembinai pris ipat Godi luꞌunai sandaꞌ lotuwanai endilisi gani ilif heven

1 Basef amama andaꞌami mape maliꞌi, ofagema naꞌama. Apeꞌ anona Dembinai pris nape naliꞌma pris hiami naꞌama etin siꞌi basef maliꞌi maꞌiam. Anan nape sia buꞌunai Dembinai lagel daꞌisinai gani heven ilif. 2 Anan nandaꞌ maol anama nondolali ma God ipat luꞌunai Ananinai. Ipat anama sandaꞌ lotu endilisinai. Anona aman ina nalaꞌ ipat anama, owaꞌ. Dembinai atona nalaꞌana notawa.

3 Fowaꞌ gani God nandandepa amam dembemi pris mofaꞌ amamaga buꞌwami gwaꞌaimi mafis mamumami ma mondolalimana. Eaꞌ Dembinai apeꞌinai wapotiꞌ God nandandepana ma nofaꞌai anom amamaga nondolalimanami. 4 Iꞌi Anan etapanai, Anan ina deiꞌ nope dembinai pris, owaꞌ. Deiꞌ main, amam hiami mape pris etap anaeꞌ mandaꞌ maola mofaꞌai amamaga amama hiami mondolalima God, siꞌi miꞌuli God fowaꞌ nasoꞌ Mosesanai naꞌiam. Anan ina nape nandaꞌ maol anama etap anaeꞌ, owaꞌ. 5 Amam pris hiami mandaꞌ maol anama mondolalima God mandaꞌ maol ipat Ananinai fowaꞌ sandaꞌ lotuwanai nandaꞌ ikwaf atona ma ipat endilisinai buꞌunai nape heveni. Amama atom nemaf anama Moses naꞌi nolaꞌ ipat anama sowaloꞌ selanai, God naꞌipana naꞌi, “Ineꞌ nindumafuma umbamehena andeandeꞌma nambimb nendaꞌ amamaga hiami hiꞌilam migiꞌmam mondahamam endilisi siꞌi ikwaf anama Aeꞌ ihiꞌambenana eaꞌ halaf Sainai.”

6 Eaꞌ Jisas nandaꞌ maol anama nondolalima God eaꞌ maol anama nikilaꞌ endilisi maol amam pris fowaꞌimi mandaꞌanai siꞌi basef amama dambaimi mikilaꞌ basef fowaꞌimi God naꞌi endilisimi atom naloma Moses. Basef amama dambaimi, Jisas Anan nape laꞌafena God naloma epes Ananisi ma basef amama mikilaꞌ basef amama fowaꞌimi. Amama atom deiꞌ basef amama dambaimi mataga mawalapai basef buꞌwami endilisimi mikilaꞌ fowaꞌimi.

Basef dambaimi God naꞌi endilisimi atom nalomapa mikilaꞌ basef endilisimi fowaꞌimi

7 Basef amama fowaꞌ God naꞌi endilisimi atom naloma Moses ina mape boꞌom laꞌelaꞌef, owaꞌ. Iꞌi mope boꞌom laꞌelaꞌef, deiꞌ basef amama God naꞌi endilisimi magiꞌi maol aꞌam. 8 Eaꞌ God nawalapa waf aonai epesi naꞌi,

“Aeꞌ Dembiwei aꞌi, peme! Anona nemaf endaꞌ anom basef dambaimi iꞌi endilisimi atom eloma esis epes hiesi wambota Israeli ma epes hiesi Judai wapotiꞌ. 9 Basef amama dambaimi ina mandahama amama anom fowaꞌimi aꞌiam aloma esis, owaꞌ. Fowaꞌ aꞌi basef amama alomas, nemaf anama ahapila lagof asasimi efaꞌas sakwaha etap hiagoma Isip safeꞌ. Eaꞌ esis ina saila basef amama aꞌiam endilisimi atom, owaꞌetin. Eaꞌ deiꞌ ewaꞌ alafuga ma esis. Aeꞌ Dembiwei aꞌiam naꞌama. 10 Nimeguf amama hiꞌilam anona nemaf, Aeꞌ iꞌi anom basef endilisimi atom eloma epes hiesi wambota Israel. Aeꞌ dembiwei aꞌiam naꞌama. Basef amama ofagema naꞌama. Anona nemaf endaꞌ miꞌuli aeꞌanai nepe opalef asasimi nomon, eaꞌ endaꞌana nepe ukup asasimi nomon. Eaꞌ epe God asasiwei, esis sope amam nematawa aeꞌasi. 11 Nemaf anama esis amam nematawa hiesi atona etin maol aꞌasa sowalipa esis alupusi asasisi soloma sahin owan asasisi siꞌi, ‘Ipeꞌ pegawa Dembinai’, owaꞌ. Deiꞌ main, nogota anama epes hiesi sogawa Aeꞌ andeandeꞌ, awasi dambesi wapotiꞌ. 12 Anona nemaf Aeꞌ iti esis uwahipis igiambamas naꞌa sotanimani sope andeandeꞌ, ekwahomasa waf aonai esis sandaꞌanai. Waf anama aonai esis sandaꞌanai Aeꞌ ina ataꞌ okom naꞌiana wapotiꞌ, owaꞌ.”

13 Basef amama deiꞌ naꞌi endilisimi atom God nofalam naꞌi basef amama dambaimi, mandaꞌ amama fowaꞌ naꞌiam endilisimi atom deiꞌ mataga apim eaꞌ. Amamaga mataga apimi amama mope nogota bandana ma higililam hiꞌilam.

<- HIBRU 7 HIBRU 9 ->