Aposel 2

Godna Sungwag pebona

1 Afa mahim Pentikos buyis pugunaba enanam Ainiyagna el mungo lala nuwag gofena. 2 Afa so auneh gweyi ikagna puguna heven wa gohnam afa bona el nuwagig lalam puguagena. Ofenaiba bifwat obo. 3 Afa nangunibi ofenaiba suwi mileg bo kokohiagim ahu elni nihiba lasai. 4 Afa mungwali elim Godna Sungwag bo yuhwa fenugenaba eso ahanaig ahanaig mona sihiagini. Eba Sungwag ehe esenigba enag so ahanaig ahanaig moba sihiagini.

5 Afa mingnag Ju el Godum lotu finig afa mungwali bite so gohkafena enag ambugog Jerusalem wa gofena. 6 Mahim enag auneh pugunaba eso el numb ambugog nuwagnam mom higahufna mahim Ainiyagna el enaig esofifnibi eso sineminefini mahim mungo mungog el ehengelni mona sihiag ofifinibi. 7 Enag Ju el hugna sineminefini afa esogona og, “Kati anwanafig sonag elbi eba Galili wa nai, 8 asegba eso big mungo mungo higigbi bigelni mona mog? 9 Eso bigel Partiana kimbig wa nai afa Midia nai afa Elam wa nai afa bigel mingnag distrik Mesopotemia wa auguia enag feg afa distrik Judia nai afa Provins Kapadosia wa nai afa Provins Pontus wa nai afa Esia nai afa. 10 distrik Frigia nai afa Pamfilia nai afa Isip nai el afa distrik Libia nai Sairini muhwa nai afa bigel Rom wa nai ambugog ohi gohka. 11 Afa Ju afa minginag el Ju elni lotu nai afa Krit afa distrik Arebia nai bigel big mungwali ena mo biafgelni mungo mungo mona higig sonag elbi sihigbi eba Godna kigmogna gafugafig.” 12 Afa mungwali olug fingi feskofenam onigigafafna. Afa hefum sihiagini og, “Sonaig pugugba yuwaba enaba mang mahim?”

13 Afa mingnag mo enaig mo sihini og, “Ei, eba uflogna bu ahgagim enag eba mo etetiag ofi.”

Pita mo sihina

14 Eso Pita 11 pela pahlukuiag elim wan gohnam afa so hugna unetigina og, “Nengel Judia nai afa mungwali el ambugog Jerusalem gohka so kana mom higahufum eso ena mog so yawo mangwalba ne nangug ka nem ambagwa osihin. 15 Ne enaig onigig, ne og sona elbi mo etetiag ofi. Amo eba awai, eba yawo lawamhe. 16 Afa yawo enaigba pugug enaba autunam Joel Godna mo fa sihiaule el enaig sihi wahiana og;

17 God ati sihig awaiyeg osuna mahim meini ofefiba eba ka kikeafna sungwagim mungwali elim ningihianif afa so nengelni fangonai luwal i afa naini luwal i kana mo fi sihiahufufe afa kwablog el itiwa lofug ahanaig ahanaigim nangogihiagig, afa muhna el itiwa panangiagif. 18 Afa enanam ka kikeafna sungwag kikeafna gafugag kwamblo afa angwafigim ka faif eso kikeafna mo fi sihiahufuf. 19 Eba ka eseba eso ofwa ahanaig ahanaig puguafi afa bite wa gaba puguafi eba taf i suwi i afa suwieg i enaig puguagef. 20 Afa osu kifiakohla fegif afa was pugu tafukleg eso negigim Ainiyagna osuna mo puguf enag osunam Ainiyag heafna kigmog i afa afwambusug i wagfuf. 21 Afa enanam mungwali amangel so Ainiyagim uninif og, ma kam kwagani, afa so ehe wambuf eso ehengel wangineg augufef. Jol 2:28-32

“Enaba Joel Godna mo fa elni mo sihi wahiag. 22 Ne Israel el numwehe kana mo higini ka nem osihin Sisas Nasaret wa nai el, nem ne anwanafini God ati ehena ninga wa kifutigbi nem wagfunig. God ehem enaig esenagba nem og soma anwanafi heafa ehehe ena elbi ningihiagba eso bog. 23 Afa sona elbi God nengelni ninga wa wahiag afa autunam ati oniginam ena moba kikisei wahiana enaig esegim. Afa amtakwalig afwambanai el i nengel i ne li katigeg wa kokufenagigbi eso wahag. 24 God mas ena tautigba gwesim wahiana mo, eba God sona elbi bite kifenai ilafofatig mas ehem gwesim wahag mo. 25 Afa autunam Devit gaba enaig sihifena og;

Ka Ainiyagim nangug kam bog higeg muhwa fenag eso ka mas mangwalimba embefenai. 26 Enaig fenaba enag so kana olug lahlag nemug go eso ka sifakal mo eseg, afa ka nengego eligim lahlagim eso God membeg kam esenagim. 27 Eba mas ne kam elim pigieg kimbig wa wahiai, afa neana lahlag gafugag elbi so na mas ehem wahiaiba eso mas bitewaba nogi. 28 Ati ne kam wagfunag nofkikena fag minagagba so na ka i ahgofiba ka so hugna sifakale. Sam 16:8-11

“Ena moba Devit sihi wahiag. 29 Ei nilite, ka nem biafgelni simbianigam osihin, Devit ati wahag afa fakinibi afa ehena bitekfe eba gweseg bigelnai yi olyi yuwanaba go. 30 Afa Devit eba Godna mo fa sihiule el feg ehe ati anwanafeg God ini mo sihig og, nengigim ka neana mungo luwalim esenaba eso ehe nimbe lofug misog el gofe. 31 Enaig esena Devit gof ati anwanafena eso enaig sihifena og God Kraisim wahag wa nai ilafo wasuhof eso ehe mas bitekfe wa gwesim nogig mo. 32 Afa sonag el Sisas eba God ati ehem bitekfenai ilafofatigba eso ehe nofkikenaga. Afa enam ati ka nofna nanguig. 33 Afa Sisas ati sisyi fukokag Godna nihiginai ninga wa ga. Autunam Awag ehem sihi wahiana heafna Sungwag pe bof. Afa ehe ati enam ningihiagba eso yuwaba ne enam nangug afa higig. 34 Devitba mas Sisas so esena hevengam fukokana enaig esena mo. Afa Devit enaig esona, og;

God ati kana Ainiyagim enaig sihifena, og, ne kana nihiginai ninga wa gafif. 35 Eba yuhwafef ka angoluwag elim neana ninga wa hwatiba so ma nem ahnai skaugfini. Sam 110:1

36 “Eso Israel nai el mungwali ne numwehe nam anwanafi Sisasba nengel tigigim li katigeg wa kahligbi God ati ehem gishu wahiana og so ma Ainiyag fenam eso elim wambu.”

37 Afa mahim mungwali el ena mom higinibi eso enag mo ehengelni olugim fingi feskofena eso ehengel Pita mi afa mingnag kanog hwatieg el mi sahigoni og, “Nilite, ahanaig so ka esif?”

38 Afa so Pita sihini og, “Nengel so mungo mungo mungwali olug wahigifinim Sisas Kraisna unehlag wa bu wa apaigoiba so ma God nengelni amtakwalig nihem fa fatini ma ne enaig esibi eba God nem heafna Sungwag faif. 39 God ati autunam sihi wahiana Sungwag nem faigimba, afa nengelni luwal i afa wahigwanai el i gwenaig esenif. Afa God bigelni Ainiyag mungwali elim ehe awamonigim gaba ati sihi wahiana.”

40 Afa Pita mingnag enaksag mo sihinugenam afa kifutig mo faini og, “Numwehifibi masa nem amtakwalig el nahgum awaief.” 41 Pita mo sihinaba eso el numb olug oniginim eso buwa mo apaigona afa mingnag ambugog pahsihianaba ehengelni nambaba 3,000 enaig fena.

Mungwali mungo onigig sihini

42 Ehengel kanog hwatieg elni mom ati ugwe higini eso hefum fakwegfu feagini afa ambugog mungo wa nuwagnam fane ahgafna afa betennifini. 43 Afa God kanog hwatieg elni ninga wa ahanaig ahanaig kigmog esenibi eso mungwali enam nangunim afa sineminefeagini. 44 Afa mungwali el Sisasim olug oniginim mungo mo hefum sihiaginim afa heafgelni mang mang eba mungwali ehengelni fena. 45 Afa ehengel heafgelni bite i gawig i elim wahiagonifinibi eso enanam kig fifnim eso heafgelnaim elim gawig awaiyegim mimagegonfini. 46 Afa mungwali osuna Godna nalig lala nuwagenam afa mungo mungo lala nuwagenam fane ahgageahufna afa ehengel lahlafiaginim sifakaligna auguna. 47 Afa higeg Godna unehlagim fingifini eso el ehengelim olug lahlag gohnigbi. Eso Ainiyag mungwali osuna mingnagim wambfenaba eso ehengel Sisasim oniginig gwesim numb el fiagena.

<- Aposel 1 Aposel 3 ->