1 Artwa anyent Israel-kenh anenh, ranap Levi-kenharl. Artwa ra kwey aleyak anewartirrek. Arelh ra Levi-kenh arrpemarl. 2 Ingwer-inger arelh ampakert-anem irrek, rap awey akely atnyenek-anem. Arelh ra arek, awey mwerr-angker inngarl. Ra warlek irrtyertel akwernek, Egypt-areny-rnemel aremel atwekerr. 3 Alkent irrpety-penh amikwan ywarn iterrenh alakenh, “Nthakenh atha awey akely warlek intem-antey irrtyert akwerney-angenh!” Rap rtnwa akely renh arnwarnek, ankerel apernek alyelkilemel, kwatyarl nthakenh aylpey-angenh. Ra awey akely inemel, rtnwek athenek, kwaty lher Nile-warl akngek, antywer arlpenty apenng-warl kwaty-warl. Rtnwa ampa akelyenp renh arrernek kwaty-warl, apenng-angketyarr-warl. 4 Angkwerelikw renh apentek ayteyikw, amikwel kwaty-warl arrernetyek. Angkwerelikw arek, kwatyek ra rnkernek, iterrek-anem, “Mwerr apek awey yanhey?” Ra arleng-they rtnwa ampa akelyenp arntarnt-arenh.

5 Ikwer-penh Pharaoh-kenh alerikw aleyak ilkwa ra alhek kwaty lher-warl, pwerlpirretyek. Kwaty lher impalthel ra alhenh apenng-angketyarrel, arelh warrkenh akngerrel renh apentenh. Ra alhenh, rap rtnwa renh arek kwaty-itwek apenng-angketyarr-itwek. Arelh warrkenh anyent ra ilek, “Nhak alhay inetyek!” 6 Kel ra inerl-alpek kwey aleyak ikwer-warl. Kel ra altywerilek, awey akely-anem ra arek. Awey akely artnek-anem. Kwey aleyak ra amperrngirrekarl ikwer. Ra alhengk-arek, rap warrkenh anyent ilek-anem, “Ay! Ampa akely nhan Israel-kenharl!”

7 Angkwerikwan apetyek ayernemel, “Ay! Mwerrang ayeng alhem apek, arelh Israel-kenh ikngwetyek, ampa akely nhenh aylpatyel anthwengiletyek?”

8 Kwey aleyak angkek, “Ya! Kel mwerraw! Kel anamerl alhay ikngwetyek!” Angkwerikw alhek, amikw ikwerenh ikngwetyek. Kel-anem ra ikngwerl-alpek amikw ikwerenh kwey aleyak-warl. 9 Kwey aleyakel amikw awey-kenhek ilek, “Ampa nhenh aknga, aylpatyel anthwengiletyek. Ampa arntarnt-arerl-aynta, atha ngenh man anthey-akenh.” Kel amikw ikwerenhel renh apmer-warl akngeynek, arntarnt-arerl-ayntetyek, aylpatyel anthwengiletyek.

10 Ikwer-penh ampa ra alkenhirrek, arlkwenty-iperr-anem. Amikw ikwerenhel akngeynek Pharaoh-kenh alerikw-warl, antheynek renh. Ampa akely renh ikwerenh-anem alkenhilek aleyak ra. Ra itnewek-anem renh Moses, alakenh anayntileyel, “Atharl weth inek kwaty-itwek.”

11 Moses ilkwerrek, artwanem ra. Ingwer-inger ra alhek Israel-kenh warrkenh-rnem-warl, ikwerenh-rnem-warl. Ra arek, rernemarl artewentyel warrkirrek. Egypt-areny anyent ra arek, rarl whip-el artwa Israel-kenh atwek arnterr. 12 Moses ra artepang arelhek, ingwerentyel arekerr. Arrangkw. Ra iterrek, “Anyentaw ayeng, atha atwetyek!” Ahelengkw renh-anem atwek Moses-el, ipmek-antey ra atwek, arrewaly renh irrkewarl akwernetyek. Rap alpek-anem apmer-warl.

13 Ingwepenh Moses alhek angkep irrkaty-warl Israel-kenh warrkenh-rnem-warl. Artwa Israel-kenh-atherr ra arek, ilterrenharl. Artwa anyentel ra atwek artwa anyent ingwer. Moses-el renh iltek, “Ay! Ilekekarl ntwa artwa yanhan atwek? Apmer anyent-areny-atherran innganem atwerreyel!”

14-15 Artwa ra tyernek, “Nganang atyetyartarl? Angwenhel-anem ngenh arrernek, nga atyetyart anwekantherr anetyek, anwenhantherr ilayntetyek? Ayenh-anem ntwa atwetyek, wetharl ntwa atwek-apeny apmwerrkel?”