ROM 9

Coda8innig

1 Teb8emagan adi ke ikido8an, ka8in nikagina8ickisi. Jesos Christikag mega nidiji tibendagozinan. Ni8abadaig Mino Manido adi eji teb8eian acitc nikikenimidizonan e teb8eian. 2 Apanigotc kitci 8isagi kackendamomagan nidei, 3 apitc ako e mamidonenimag8a nidjiki8eg, igi8e ka 8idji inakanezimag8a. Kicpin minosegiban kidji 8idoka8ag8a, nida min8endan kidji nabicka8ag8a, Kije Manido dac nin meckodj kidji ana8enimijidj, acitc nin meckodj ega Jesos Christikag kidji iji tibendagozian. 4 Israel a8iagog mega igi. Kije Manido ogi onabaman odabinodjijiman kidji ijinagozindjin. Ogi 8abadaan adi epitci icpendagozidj. Ogi ojitonan onakomo8inan 8ina8a odji. Ogi minan odinakonige8inan. Ogi 8idama8an adi eji nda8enimadjin kidji icpenimigodjin. Acitc ogi 8idama8an adi ke iji ag8acimadjin. 5 8eckadj kikitci anicinabeminabanig Abanaam (Abraham) acitc Aisik (Isaac) acitc Tcekap (Jacob) iji odadabigicino8ag. Ke8in Jesos Christ Israelikag ki pi odji apitc ka pi anicinabe8iidizodj. Kije Manido8i aa, kakina kegoni ka tibendag. Midac kabegotc icpenimadan! Amen.

6 Ka8in 8in nidikidosi ega egi todag Kije Manido adi kagi ikidodj. Nandam mega Israel a8iagog ka8in Kije Manidokag iji tibendagozisi8ag. 7 Kakina Israel a8iagog Abanaamikag iji odaiagizi8ag, ka8in dac kakina odabinodjijimini inagimagani8isi8ag. 8eckadj mega Kije Manido ogi inan Abanaaman:

“Aisikikag kada pi odaiagizi8ag

igi8e kidanike ojisag ke inagimagani8i8adj.”Genèse 21.12

8 Kitci mane8ag sa Abanaamikag ka pi odji odaiagizi8adj, midac ka8in igi kakina Kije Manido odabinodjijiman odji inagimagani8isi8ag. Anic dac Kije Manido ogi nigani 8idama8an Abanaaman kidji pi nta8igindjin pejig abinodjijan. Igi8e dac aa abinodjijikag ka pi odji odaiagizi8adj, mi igi8e enagimagani8i8adj Kije Manido odabinodjijiman. 9 Mi mega oo8eni kagi inadjin Kije Manido Abanaaman:

“Ki pejigopibonagag niga koki pija.

Ii dac apitc, aja Sara kadagi odji og8izisi.”Genèse 18.10,14

10 Kije Manido ogi nigani 8idama8an Rebekan (Rébecca) ke8in adi ke iji8ebanig. Mi aa kikitci anicinabeminaban Aisik eji odadaminigobanen midjinijin Rebeka og8izisan kagi iji nijonta8igindjin. 11-12 Kije Manido dac ogi inan Rebekan:

“Aa8e nitam ka nta8igidj

oga anokita8an ini8e ick8eag ka nta8igindjin.”Genèse 25.23

Apitc Kije Manido ka ikidodj oo8eni, ka8in maci nta8igisibanig igi ockina8esag, acitc dac ka8in maci odji mino ijitcigesibanig kek8an odji madji ijitcigesibanig. Kije Manido dac 8edji ki ikidopan ii, kidji 8abadai8edj e todag ako adi eji min8endag kidji todag. Odonabaman pejig a8ian osa mega o8i nd8e8eman, ka8in 8in egi mino ijitcigendjin odji. 13 Mi gotc maia kagi iji ojibiigadenig Kije Manido Omazinaiganikag:

“Nigi onabama Tcekap (Jacob).

Isa8 (Esaü) dac nigi ana8enima.”Malachie 1.2-3

14 Ikidomagan na dac ii Kije Manido ega k8aiak e toda8adjin a8iagon? Ketcinadj ka8in ii! 15 8eckadj mega ogi inabanin Moisan:

“8i kidimagenimag a8iag, niga kidimagenima,

acitc 8i mino toda8ag a8iag, niga mino toda8a.”Exode 33.19

16 Midac Kije Manido odonabaman a8ian ka 8i kidimagenimadjin. Ka8in 8in eji nda8endamindjin ini a8ian 8edji kidimagenimadjin, acitc ka8in 8in egi kitci nak8indjin kidji onabamagani8indjin. 17 Ojibiigadenigoban Kije Manido Omazinaiganikag 8eckadj kagi inagobanen Idjip ogiman:

“Kigi minin kidji ogima8ian

kidji gi odji 8abadaag8a kakina a8iagog nimacka8izi8ini,

acitc dac a8iagog mizi8ekamig kidji odji icpenimiji8adj.”Exode 9.16

18 Midac Kije Manido okidimageniman a8eneni8an 8a kidimagenimadjin, acitc kidji cibictig8anendjin oga toda8an a8ian adi eji min8endag.

Kije Manido onickadizi8in acitc okije8adizi8in

19 Ne8ad kiga ikidonan: “Kicpin dac iidi inakamigizidj Kije Manido, 8egonen 8edji inactaonadjin a8iagon egi panaagendjin? Motci ijitcige8an mega 8in kagi iji onenimadjin.” 20 A8enen enenimidizo8an kidji gi ikido8an ii? Kimotci a8iago8inan eta! Kidinenimidizonan na kidji gi odji ajidemadj Kije Manido? Kegoni a8iag kagi ojitodj 8abijickini e abadjitodj, ka8in ogagi igosin: “Adi 8edji ki ijiijian iidi?” 21 Ojidjicki8aginige8inni ogagi ojiton 8egonenigotc 8a ojitodj. Pejig eta 8abijicki mizita8inigani e abadjitodj, ogagi ojidjicki8aginan e kitci apitendag8anig onagani acitc dac kodag 8egonenaganigotc.

22 Midac Kije Manido otodan ako adigotc enendag kidji todag. Ogi nda8endan kidji 8abadai8edj adi epitci nickadizidj, acitc adi epitci macka8izidj. Midac misa8adj ogi inendan kidji cacibenimadjin a8iagon kagi nickiigodjin, kagi kackitamadizondjin kidji nici8anadjiagani8indjin. 23 Kije Manido acitc ogi iji nda8endanagoban kidji 8abadai8edj okitci icpendagozi8in, kagi minigo8ak kina8it e kidimagenimigo8ak, kagi nigani onabamigo8ak kidji odisigo8ak odicpendagozi8in. 24 Kina8it mega kagi nd8e8emigo8ak. Ka8in dac kakina ka taciak Kicoda8inni8isimin, nandam ka taciak pakan kidinakanezimin. 25 Mi gotc maia kagi ikidodj Kije Manido, kagi iji ojibiigedj niganadjimo8inni Osea (Osée):

“8eckadj ako ka8in nitibenimasi8abanig igi a8iagog,

‘nidanicinabemag’ dac niga ijinikanag igi.

8eckadj ako ka8in nisagiasi8abanig igi a8iagog,

‘ka kitci sagiag8a’ dac niga ijinikanag igi.”Osée 2.25(23)

26 Oo8eni acitc ki ikido:

“Aja 8eckadj nigi inag:

Ka8in ninikag kidiji tibendagozisim.

Kegapitc dac, mi ke odji madji ijinikanagani8i8adj:

Ka pimadizidj Kije Manido odabinodjijiman.”Osée 2.1(1.10)

27 Niganadjimo8inni Isaia ogi mikoman Israel a8iagon e tibadjimodj:

“Misa8adj Israel a8iagog

tabickotc nega8 8ajagam kitcigami apitci mane8adj,

nandam eta kada ag8acimagani8i8ag.

28 Ka8in aja kin8ej kada tanedisi ka Tibendjigedj.

Aja pecodj kada tag8icin ooma akig

kakina kidji pi ijitadj adi kagi ikidodj.”Ésaïe 10.22-23

29 Mi maiagotc kagi iji niganadjimogobanen Isaia ockadok:

“Kicpin ma8adji ka kitci macka8izidj ka Tibendjigedj

ega ki onendagiban kidji ag8acimadjin

nandam kina8itinakag ke odakanezindjin,

kidagi nici8anadjiigomin kakina,

tabickotc igi8e a8iagog 8eckadj Sodom odenag

acitc Gomora (Gomorrhe) odenag ka tajike8apan.”Ésaïe 1.9

Coda8innig ka8in ododji teb8eta8asi8a8an
Kije Manidon

30 Mi oo 8a ikido8ag. Ega ka Coda8inni8i8adj ka8in ok8ag8edjitosina8aban kidji k8aiak8abamigo8adjin Kije Manidon. Misa8adj dac ogi k8aiak8abamigo8an, osa mega ogi teb8eta8a8an. 31 Israel a8iagog dac 8ina8a, ok8ag8edjitona8aban kidji nosoneamo8adjin inakonige8inan, kidji gi odji k8aiak8abamigo8adjin Kije Manidon. Ka8in dac ododji k8aiak8abamigosi8an. 32 Adi dac 8edji ega ki k8aiak8abamagani8i8adj? Ka8in mega ododji teb8eta8asi8a8an. “E mino ijitcigeian niga odji k8aiak8abamig Kije Manido,” ki inendamog. Ki sakak8ae8ag dac “asinin ka pizogecimi8endjin.” 33 Mi iidi kagi iji mikomagani8idj aa asini Kije Manidon Omazinaiganikag:

“Kijigabadamok!

Nidonasa Sion odenag pejig asini kagi onabamag.

Mi aa asini ka pizogecimadjin a8iagon,

acitc ka toda8adjin kidji pagicinindjin.

Pekic dac a8enenigotc ke teb8eta8ag8enin,

ka8in 8ikad ‘ceck8at niteb8eta8a’ kada inendasi.”Ésaïe 28.16

<- ROM 8 ROM 10 ->