ܐ ܦܛܪܘܣ 3

ܒܟ݂ܬܬ̈‌ܐ ܘܓܒ݂ܪ̈ܢܐ

1 ܗܵܕܟ݂ܵܐ ܐܘܼܦ ܐܲܚܬܘܿܢ ܒܲܟ݂ܬܵܬܹ̈‌ܐ، ܫܠܘܿܡܘܼܢ ܠܓܲܒ݂ܪ̈ܵܢܵܘܟ݂ܘܿܢ، ܗܵܕܟ݂ܵܐ ܕܐܸܢ ܐܝܼܬ ܡܸܢܵܝܗ‌ܝ ܕܠܹܐ ܡܲܨܝܸܬ‌ܝܼ ܠܗܹܡܸܙܡܵܢ، ܐܝܼܢܵܐ ܕܠܵܐ ܗܹܡܸܙܡܵܢ ܦܵܝܫܝܼ ܡܘܼܕܸܪܹܐ ܠܗܲܝܡܵܢܘܼܬܵ‌ܐ ܒܝܲܕ ܕܘܼܒܵܪܹ̈ܐ ܕܒܲܟ݂ܬܵܬܹ̈‌ܐ، 2 ܐܝܼܡܲܢ ܕܚܵܙܝܼ ܕܸܟ݂ܝܘܼܬܵ‌ܐ ܘܐܝܼܩܵܪܵܐ ܕܚܲܝܵܘ̈ܟ݂ܘܿܢ. 3 ܠܵܐ ܗܵܘܝܵܐ ܣܲܩܲܠܬܵܘܟ݂ܘܿܢ ܒܲܪܵܝܬܵ‌ܐ، ܒܓܕܵܠܬܵ‌ܐ ܕܟܵܘܣܵܐ، ܘܠܒ݂ܵܫܬܵ‌ܐ ܕܕܲܗܒ݂ܵܐ، ܝܲܢ ܒܓ̰ܘܼܠܹ̈ܐ ܫܲܦܝܼܪܹ̈ܐ؛ 4 ܐܝܼܢܵܐ ܗܵܘܝܵܐ ܓܵܘܵܐܝܼܬ ܡ̣ܢ ܠܸܒܵܐ، ܒܪܘܼܚܵܐ ܡܲܟܝܼܟ݂ܬܵ‌ܐ ܘܫܠܝܼܬܵ‌ܐ ܕܠܵܐ ܦܵܝܫܵܐ ܚܪܝܼܒ݂ܬܵ‌ܐ، ܕܝܼܠܵܗ̇ ܡܵܪܹܐ ܛܝܼܡܵܐ ܠܟܸܣ ܐܲܠܵܗܵܐ. 5 ܣܵܒܵܒ ܗܵܕܟ݂ܵܐ ܐܘܼܦ ܒܕܲܥܒܲܪ ܒܲܟ݂ܬܵܬܹ̈‌ܐ ܩܲܕܝܼܫܹ̈ܐ، ܐܵܢܝܼ ܕܕܸܪܝܵܐ ܠܗܘܿܢ ܗܹܒ݂ܝܼܵܝܗ‌ܝ ܠܐܲܠܵܗܵܐ، ܟܹܐ ܣܲܩܠܝܼ ܗܘܵܘ ܓܵܢܵܝܗ‌ܝ، ܫܵܠܡܵܢܹ̈ܐ ܝܗܘܵܘ ܠܓܲܒ݂ܪ̈ܵܢܵܝܗ‌ܝ، 6 ܕܵܐܟ݂ܝܼ ܕܣܲܪܵܐ ܫܠܝܼܡ ܠܵܗ̇ ܠܐܲܒ݂ܪܵܗܵܡ ܘܟܹܐ ܩܵܪܝܵܐ ܗܘܵܐ ܠܹܗ ”ܡܵܪܝܼ“، [~1~] ܘܐܲܚܬܘܿܢ ܒܢܵܬܘܼ̈ܗ̇ ܝܬܘܿܢ ܐܸܢ ܥܵܒ݂ܕܝܼܬܘܿܢ ܛܵܒ݂ܬܵ‌ܐ ܘܠܵܐ ܦܵܝܫܝܼܬܘܿܢ ܫܥܝܼܫܹܐ ܒܗܸܟ̃ ܙܕܘܼܥܬܵ‌ܐ. 7 ܗܵܕܟ݂ܵܐ ܐܘܼܦ ܐܲܚܬܘܿܢ ܓܲܒ݂ܪ̈ܵܢܹܐ، ܚܹܝܡܘܼܢ ܥܲܡ ܒܲܟ݂ܬܵܬܵܘ̈ܟ݂ܘܿܢ ܟܲܕ ܒܝܼܕܵܥܵܐ ܕܒܲܟ݂ܬܵ‌ܐ ܝܼܠܵܗ̇ ܦܲܪܨܘܿܦܵܐ ܒܘܼܫ ܙܲܒܘܼܢ. ܡܝܲܩܪܘܼܢ ܠܒܲܟ݂ܬܵܬܵܘ̈ܟ݂ܘܿܢ ܣܵܒܵܒ ܐܘܼܦ ܐܵܢܝܼ ܝܵܪ̈ܘܿܬܹ‌ܐ ܝܢܵܐ ܥܲܡܵܘܟ݂ܘܿܢ ܒܫܵܦܵܩܲܬ ܕܚܲܝܹ̈ܐ، ܕܠܵܐ ܦܵܝܫܝܼ ܡܘܼܟܠܝܼܹܐ ܨܠܵܘܵܬܵܘ̈ܟ݂ܘܿܢ.

ܓ̰ܘܢܓ̰ܪ̈ܐ ܒܘܬ ܙܕܝܩܘܬ‌ܐ

8 ܒܚܲܪܬܵ‌ܐ، ܟܠܵܘܟ݂ܘܿܢ ܗܘܹܝܡܘܼܢ ܒܚܲܕ ܪܸܥܝܵܢܵܐ، ܡܪ̈ܲܚܡܵܢܹܐ ܚܲܕ ܠܗ̇ܘ ܐܚܹܪܢܵܐ، ܡܲܚܸܒܘܼܢ ܐܲܝܟ݂ ܐܲܚܘܿܢܘܵܬܹ̈‌ܐ، ܡܪ̈ܲܚܡܵܢܹܐ، ܡܲܟܝܼܟܹ̈ܐ. 9 ܠܵܐ ܦܵܪܥܝܼܬܘܿܢ ܒܝܼܫܬܵ‌ܐ ܚܠܵܦ ܒܝܼܫܬܵ‌ܐ، ܘܠܵܐ ܡܲܣܚܲܪܬܵ‌ܐ ܚܠܵܦ ܡܲܣܚܲܪܬܵ‌ܐ، ܐܸܠܵܐ ܡ̣ܢ ܓܹܒܵܐ ܕܐܲܢܹܐ ܒܲܪܟ݂ܘܼܢ، ܣܵܒܵܒ ܠܐܵܗܵܐ ܦܝܼܫ ܠܵܘܟ݂ܘܿܢ ܩܸܪܝܹܐ ܕܝܵܪܬܝܼܬܘܿܢ ܒܘܼܪܟܬܵ‌ܐ. 10 ܣܵܒܵܒ:

ܟܠܔ ܡ̇ܢ ܕܡܲܚܸܒ ܚܲܝܹ̈ܐ ܘܒܵܥܹܐ ܕܚܵܙܹܐ ܝܵܘܡܵܢܹ̈ܐ ܛܵܒܹ̈ܐ، ܫܒ݂ܘܿܩ ܢܵܛܹܪܹܗ ܠܸܫܵܢܹܗ ܡ̣ܢ ܒܝܼܫܬܵ‌ܐ ܘܣܸܦܘܵܬܘܼ̈ܗ‌ܝ ܡ̣ܢ ܗܲܡܙܘܼܡܹܐ ܦܸܠܡܵܐ.

11 ܫܒ݂ܘܿܩ ܕܵܐܹܪ ܡ̣ܢ ܒܝܼܫܬܵ‌ܐ ܘܥܵܒܹܕ ܛܵܒ݂ܬܵ‌ܐ، ܛܵܥܹܐ ܫܠܵܡܵܐ ܘܪܵܚܹܛ ܒܵܬܪܹܗ.

12 ܣܵܒܵܒ ܥܲܝ̈ܢܹܐ ܕܡܵܪܝܵܐ ܥܲܠܔ ܙܲܕܝܼܩܹ̈ܐ ܝܢܵܐ، ܘܢܵܬܝܵܬܘܼ̈ܗ‌ܝ ܦܬܝܼܚܹܐ ܝܢܵܐ ܠܨܠܵܘܵܬܵܝ̈ܗ‌ܝ، ܐܝܼܢܵܐ ܦܵܬܵ‌ܐ ܕܡܵܪܝܵܐ ܕܲܠܩܘܼܒ݂ܠܔ ܕܥܵܒ݂ܕܵܢܹ̈ܐ ܕܒܝܼܫܬܵ‌ܐ ܝܠܵܗ̇.[~2~] 13 ܡܵܢܝܼ ܒܸܬ ܥܵܒܹܕ ܒܝܼܫܬܵ‌ܐ ܐܸܠܵܘܟ݂ܘܿܢ ܐܸܢ ܗܵܘܹܝܬܘܿܢ ܛܲܢܵܢܹ̈ܐ ܠܸܥܒ݂ܵܕܵܐ ܛܵܒ݂ܬܵ‌ܐ؟ 14 ܐܝܼܢܵܐ ܐܵܦܸܢ ܕܓ̰ܲܢܓ̰ܸܪܝܼܬܘܿܢ ܒܘܼܬ ܙܲܕܝܼܩܘܼܬܵ‌ܐ، ܛܘܼܒ݂ܵܐ ܐܸܠܵܘܟ݂ܘܿܢ. ܠܵܐ ܙܵܕܥܝܼܬܘܿܢ ܡ̣ܢ ܐܵܢܝܼ ܕܡܲܙܕܸܥܝܼ ܠܵܘܟ݂ܘܿܢ، ܘܠܵܐ ܦܵܝܫܝܼܬܘܿܢ ܫܓ݂ܝܼܫܹܐ.[~3~] 15 ܐܸܠܵܐ ܩܲܕܫܘܼܢ ܠܡܵܪܝܵܐ ܡܫܝܼܚܵܐ ܒܠܸܒܵܘܟ݂ܘܿܢ، ܘܒܟܠܔ ܙܲܒ݂ܢܵܐ ܗܘܹܝܡܘܼܢ ܗܕܝܼܪܹܐ ܕܝܵܗܒ݂ܝܼܬܘܿܢ ܓ̰ܘܼܘܵܒ ܠܟܠܔ ܚܲܕ ܕܒܲܩܸܪܵܘܟ݂ܘܿܢ ܒܘܼܬ ܥܸܠܬܵ‌ܐ ܕܗܹܒ݂ܝܼ ܕܐܝܼܬ ܠܵܘܟ݂ܘܿܢ، ܐܝܼܢܵܐ ܓ̰ܲܘܸܒܝܼܬܘܿܢ ܒܡܲܟܝܼܟ݂ܘܼܬܵ‌ܐ ܘܒܐܝܼܩܵܪܵܐ، 16 ܘܗܵܘܹܐ ܠܵܘܟ݂ܘܿܢ ܐܸܢܝܲܬ ܛܵܒ݂ܬܵ‌ܐ، ܗܵܕܟ݂ܵܐ ܐܵܢܝܼ ܕܗܲܡܙܸܡܝܼ ܕܲܠܩܘܼܒ݂ܠܔ ܕܕܘܼܒܵܪ̈ܵܘܟ݂ܘܿܢ ܫܲܦܝܼܪܹ̈ܐ ܒܡܫܝܼܚܵܐ ܢܵܟ݂ܦܝܼ ܕܒܸܠܝܵܡܵܘܟ݂ܘܿܢ ܝܼܢܵܐ. 17 ܣܵܒܵܒ ܒܘܼܫ ܨܦܵܝܝܼ ܝܠܵܗ̇، ܐܸܢ ܨܸܒ݂ܝܵܢܵܐ ܕܐܲܠܵܗܵܐ ܝܠܹܗ، ܕܓ̰ܲܢܓ̰ܸܪܝܼܬܘܿܢ ܒܘܼܬ ܚܵܬܸܪ ܕܫܘܼܠܵܐ ܛܵܒ݂ܵܐ ܡ̣ܢ ܕܓ̰ܲܢܓ̰ܸܪܝܼܬܘܿܢ ܒܘܼܬ ܚܵܬܸܪ ܕܫܘܼܠܵܐ ܒܝܼܫܵܐ. 18 ܣܵܒܵܒ ܐܘܼܦ ܡܫܝܼܚܵܐ ܡܝܼܬ ܠܹܗ ܚܕܵܐ ܓܵܗܵܐ ܡܼܢ ܓܹܒܵܐ ܕܚܛܝܼܵܬܹ̈‌ܐ، ܙܲܕܝܼܩܵܐ ܡ̣ܢ ܓܹܒܵܐ ܕܥܵܘܵܠܹ̈ܐ، ܕܩܲܪܒܸܢ ܗܘܵܐ ܠܵܘܟ݂ܘܿܢ ܠܐܲܠܵܗܵܐ. ܦܝܼܫ ܠܹܗ ܩܛܝܼܠܵܐ ܒܦܲܓ݂ܪܵܐ ܐܝܼܢܵܐ ܦܝܼܫ ܠܹܗ ܡܘܼܚܝܼܵܐ ܒܪܘܼܚܵܐ، 19 ܕܒܝܼܹܗ ܐܘܼܦ ܐܙܝܼܠܔ ܠܹܗ ܘܡܘܼܟܪܸܙ ܠܹܗ ܠܓܵܢܵܬܹ̈‌ܐ ܕܓܵܘ ܒܹܝܬ ܐܲܣܝܼܪܹ̈ܐ، 20 ܐܵܢܝܼ ܕܩܲܕܡܵܝܬܵ‌ܐ ܠܵܐ ܡܘܼܨܝܸܬ ܠܗܘܿܢ ܐܝܼܡܲܢ ܕܐܲܠܵܗܵܐ ܚܡܝܼܠܔ ܠܹܗ ܒܝܵܘܡܵܢܹ̈ܐ ܕܢܘܿܚ ܒܥܕܵܢܵܐ ܕܩܹܒ݂ܘܼܬܵ‌ܐ ܦܝܵܫܵܐ ܝܗܘܵܐ ܒܢܝܼܬܵ‌ܐ، ܐܝܼܡܲܢ ܕܐܝܼܬ ܗܘܵܘ ܓܵܘܘܼܗ̇ ܚܲܕܟ̰ܵܐ ܓܵܢܵܬܹ̈‌ܐ، ܬܡܵܢܝܵܐ ܦܲܪ̈ܨܘܿܦܹܐ، ܕܦܝܼܫ ܠܗܘܿܢ ܦܪܝܼܩܹܐ ܒܡ̈ܝܼܵܐ.[~4~] 21 ܐܵܗܵܐ ܚܲܕ ܛܘܼܦ̮ܣܵܐ ܝܠܹܗ ܕܡܲܥܡܘܿܕܝܼܬܵ‌ܐ، ܗ̇ܝ ܕܐܘܼܦ ܐܵܕܝܼܵܐ ܟܹܐ ܦܲܪܩܵܐ ܠܵܘܟ݂ܘܿܢ، ܠܵܐ ܒܕܲܟܲܝܬܵ‌ܐ ܡ̣ܢ ܫܸܚܬܵ‌ܐ ܕܦܲܓ݂ܪܵܐ، ܐܸܠܵܐ ܒܐܸܢܝܲܬ ܛܵܒ݂ܬܵ‌ܐ ܠܟܸܣ ܐܲܠܵܗܵܐ، ܒܝܲܕ ܩܝܵܡܬܵ‌ܐ ܕܝܼܫܘܿܥ ܡܫܝܼܚܵܐ، 22 ܗ̇ܘ ܕܐܙܝܼܠܵܐ ܝܠܹܗ ܠܫܡܲܝܵܐ ܘܕܝܼܠܹܗ ܡ̣ܢ ܝܲܡܝܼܢܵܐ ܕܐܲܠܵܗܵܐ؛ ܘܙܲܒܛ ܝܼܢܵܐ ܐܸܠܹܗ ܡܲܠܲܐܟܹ̈ܐ ܘܫܲܠܝܼ̈ܛܹܐ ܘܚܲܝܠܵܘܵܬܹ̈‌ܐ.

<- ܐ ܦܛܪܘܣ 2 ܐ ܦܛܪܘܣ 4 ->