Miamun 33

Yakop da Rainggan Isau Iwaꞌ da Ruan

1 Yakop iraꞌ i maran da itsangan Isau ruta garaman 400 badan. Da itangin narun rusan yatsungꞌ rinan ruas, Lia, Retsel da gan sagat guman iruꞌ igi. 2 Itangin sagat gum iruꞌ igi impruꞌ da narun rusan imungꞌ miamun. Ida Lia da narun rusan yatsungꞌ ifan. Da Retsel da narunggan Yosef imingꞌ bampan gin. 3 Yakop runggan imungꞌ ifan i riban santan, da yidzaꞌ fagan da itauf maran iruꞌ intap da yuriꞌ, da inang ibinigi angu isangꞌ 7 imingꞌ sanab ifan da rainggan.

4 Da bitsintaꞌ Isau irunt iba i waꞌa da rainggan da impung Yakop da itsutsuf arangan. Da rib iruꞌ igi irang da ruan. 5 Da Isau iraꞌ i maran da itsangan sagat da mamaꞌ narun da igutin, “U rut rib idzuwai bingan aga ba?”

Da Yakop ini, “Nigi mamaꞌ narun Anutu maraampi gan riman da dzi, u garam gumam.” 6 Da sagat gum iruꞌ igi da narun rusan iba da yidzaꞌ fagan da itauf maran iruꞌ intap imingꞌ Isau maran. 7 Ida Lia da narun rusan iba da itatapuangꞌ iruꞌ intap imingꞌ Isau maran. Raiyi da Yosef da rinanggan Retsel iba da runang ibinigi angu. 8 Isau ini binaꞌ, “Dzi mingꞌa naga badan da dzi tsanga apu utup utup, da nigi wainggan ibi anungꞌ?”

Yakop ini arangan nan gan mungaꞌ ibiani, “Nam dzi riman da agu igi da dzi rim i yafada u wangum i u tsanganda dzi bini.”

9 Da bitsintaꞌ Isau ini binaꞌ, “Rainggan, dzi sangꞌ inting angu. Nigi runamingꞌ da agu.”

10 Da Yakop ini, “Imaꞌ. Dzi gampun runggangꞌ da agu. Dzi yut apu ani ruta wangunggangꞌ santan ibiaꞌ da agu. Bida u maram arida i dzi da wayu. I dzi nugungꞌ itsiaꞌ nidzun angu i tipa tsanganda u maranggam ibi dzi tsanganda Anutu maran, i u yu dzi iyab. 11 Dzi gaib runggangꞌ da agu i uda nam dzi riman da agu igi. Anutu isu maraampi da dzi, da dzi wasau runggangꞌ i nam mangan u.” Yakop irim udzung da Isau isangꞌ arangan itaga ruan i udan.

12 Da Isau ini da Yakop, “Agi mpruꞌa runggangꞌ fadan.”

13 Da bitsintaꞌ Yakop ini da arangan, “Dzi garamang tsiraꞌ, u tsangan mamaꞌ narun narun aga anungꞌ tsiraꞌ tsiraꞌ u. Da dzi nampa tayangꞌ makau da dumpa rinan narun ruas rututan. Bida dzi usudan da yunga sanab guntiꞌ da gubuꞌ bitsintaꞌ angu da apu santan bungꞌ amamp sib i. 14 Ibinigi da garam tsiraꞌ, wamungꞌ wabiaꞌ i dzi, u garam gumam. Dzi bungꞌ ayung da nairab i apu santan da mamaꞌ narun natsungꞌ agu nabiaꞌ nasangꞌ waꞌa da agu mingꞌa intap Seir.”

15 Isau ini, “Da nabinigi da dzi natangin garam fain da agu i rima agu sib.”

Da Yakop ini arangan nifunggan mungaꞌ ini binaꞌ, “Dangki tsiraꞌ. Da bitsintaꞌ anungꞌ nanga bida nigi u. Ma maram anungꞌ fura sanab ampi bingan u. Aga sangꞌ. Da bida u maram aridan da aga bungꞌ amingꞌ bampan i agu.” 16 Ibinigi da gubuꞌ arigi da Isau itangin arangan rai da itip iyung ifa Seir. 17 Da bitsintaꞌ Yakop yuriꞌ da intsungꞌ ifa Sukot. Waꞌan nigi da arangan irim gan ungaran, da irim ungar tsaparang fain i gan apu gan santan mpadan gin. I wain igi da ifaringꞌ gamp igi binganggan Sukot, wainggan ibi ungar tsaparang. 18 Impai nigi gubuꞌ fain sib raiyi, da Yakop iyung iba da ibawaꞌ bini angu imingꞌ gamp Sekem imingꞌ intap Kanan, da impa uts angu da gamp igi. Da arangan sanaban yunga mingꞌa Mesopotemia badan ibantsup imingꞌ nigi. 19 Da arangan irim nam ntsuman isangꞌ 100 silva ifan da Hamor narun rusan, Sekem da rain rusan, i intap marafain aru arangan arida ungar in igi. 20 Da yantungꞌ tauf isu mumai mararam tsarada nam in i nigi da ifaringꞌ i binganggan El-Elohi-Israil, wainggan ibiani El, Israil Anutu gan.

<- Miamun 32 Miamun 34 ->