Proverbios 4

Pengker jintanam wekasataram tusa chicharkamu

1 Uchitiram, wina chichamur pengker nintimsaram anturtuktaram. Nu antukrumka paan nintimin atinuitrume. 2 Wikia atumin pengker nuiniartatjarme. Tura asaram wi nuikiartamur umirkuram inaisairap. 3 Wikia uchi asan, aparu jeen pujain, nukuru uchiri chikichik asamtai, 4 apar nuitiak: Wina chichamur tuke nintimtusam pujusta. Tura asam wi akupamur umirkumka, nekasam pengker pujustinuitme. 5 Paan nintimratniuka tura pengker nekatniuka wakerukta. Wina chichamur kajinmakiip, turasha umirtsuk pujusaip. 6 Paan nintimratniuka inaisaip. Tura nu aneakmeka, amin ayamrutmaktinutai. 7 Mash pengker aina nuka nuna nangkamasmek paan nintimratniuka wakerukta. Kame, warinchu mash takakmena nuna nangkamasmek pengker nekatniuka wakerukta. 8 Nekatniuka mash aina nuna nangkamasmek pengkeraitai tusam nintimtusta. Nu turakmeka pengker pujustinuitme. Kame, nuwa winiaksam pengker awajsatnua nunismek paan nintimratniuka nukap wakerukta. Turakminka amincha pengker

nintimturmastinuitai. 9 Turakminka aints ainau tawaaspan shiirmachin etsengkrukar iwiarmamina nunismek pengker nintimsam pujustinuitme.

10 Tura asamtai uchiru, wina chichamur antukta. Tura wi tajame nu miatrusmek turata.

Turakmeka untsuri musach iwiaaku pujustinuitme. 11 Wikia paan nintimratniun jintanmaka wekasata

tusan nuiniarjame, tura jinta tupin amaunmasha wekamtikjame. 12 Nu jintanam wekakmeka tukumkashtinuitme. Tura ampuakmesha iyaarchatnuitme. 13 Wi nuiniarmiajme nuka kajinmatkiip.

Tura mash umirkam pengker pujustinuitme. 14 Tura asamtai, uchiru, tunau ainau wekaina nu jintanmaka wekaasaip. Tura ni turutirisha turawaip. 15-16 Yusen umirkacharu ainau tunaun takatsuk pujusar kanurchartin ainawai. Tura chikich aintsun tunaun takamtiksacharu asar, kanurtatkamawar tujintinawai. Tura asamtai Yusen umirkacharu ainau jinti wekatsuk asata. Pengké inaisata tajame. 17 Aints ainauti yurumak tura umuti wakerajina nunisarang nu aints ainau tunaun wakerinawai.

18 Antsu Yusen umirnu jintikia tsaa yamai jiinai, paan tsantua nunisang, tura tupnitak eketai, te paan tsantua nunisketai. 19 Tura Yusen umirchau aina nuna jintikia teeyaitai. Tura asamtai aneachmau warinmak tukumkarang iyaina nunaka nekaminatsui. 20 Tura asamtai uchiru, wi tajame nuka tenapkesam antukta.

21 Tura pengké kajinmatsuk wina chichamur tuke nintimin ukusta. 22 Nu chichaman antinauka tsuwakan kujarua nunisarang pengker pujusartinuitai. Turasha pengker pujustinnun wainkartinuitai.

23 Mash warinchu ainaun nangkamasmek nintim wainkata. ¿Waruka? Nujaingkia iwiaaku pujustinuitme tajame. 24 Pase chicham chichastinka inaisam, wait chichamsha pengké chichakaip. 25 Tura jiimkumka, tunau juninisha jiimtsuk, tura atuninisha jiimtsuk tupnik jiimsata. 26 Ame tuni wekame nuni mash pengker jiisam, tunaunum ayaaraim anearam wekasata. 27 Pengker jintanam wekame nunia jiinkip. Antsu tunau jintanam wekakmeka, nunia jiinkim pengker jintanam wekasata.

<- Proverbios 3 Proverbios 5 ->