Mateo 28

Rukꞌastajibꞌal ri Jesús

(Mr. 16:1-8; Lc. 24:1-12; Jn. 20:1-10)

1 Ikꞌowinaq chi ri qꞌij re uxlanibꞌal, e riꞌ katajin usaqirik ri nabꞌe qꞌij che ri semana, ri María ri aj Magdala y ri jun chik María xeꞌkila ri muqubꞌal. 2 Xaqikꞌateꞌt xpe jun nimalaj kabꞌraqan, yey waꞌ e xꞌanaw jun ángel re ri Dios xqaj lo chikaj. Echiriꞌ xopon chwach ri muqubꞌal, xresaj rabꞌaj utzꞌapim uchiꞌ ri muqubꞌal y xtzꞌuyiꞌ kꞌu puwiꞌ. 3 Ri ángel lik kawolqꞌinik, katzuꞌn jelaꞌ pachaꞌ ruxeꞌ kaj echiriꞌ kayokꞌ kaꞌnik; yey ruqꞌuꞌ lik saq pachaꞌ ri nieve.[a] 4 Ri soldados echiriꞌ xkil ri ángel, lik xkixiꞌij kibꞌ che; xkijeq kebꞌirbꞌotik y xekanaj kanoq pachaꞌ chi ekaminaq.

5 Ekꞌuchiriꞌ, xubꞌiꞌij ri ángel chike rixoqibꞌ:

—Mixiꞌij iwibꞌ. Ma riꞌin wetaꞌam e kitzukuj ri Jesús, ri xkamisax chwa cruz. 6 Rire na jinta chi wara, ma kꞌastajinaq chubꞌi jelaꞌ pachaꞌ rubꞌiꞌim chi uloq. Choꞌliwilape wa luwar pa xyaꞌiꞌ wi ri Qanimajawal. 7 Jix kꞌu riꞌix, lik chiwilij bꞌi y jiꞌbꞌiꞌij chike rutijoꞌn: “Ri Jesús xkꞌastaj bꞌi chikixoꞌl ri ekaminaq. Chiwilapeꞌ, Rire keꞌek Galilea, kanabꞌej bꞌi chiwach; chilaꞌ kꞌu riꞌ kiꞌwila wi uwach.” Ekꞌu xoꞌlnubꞌiꞌij waꞌ chiwe —xchaꞌ.

8 Echiriꞌ rixoqibꞌ xebꞌel bꞌi chuchiꞌ ri muqubꞌal, lik kixiꞌim kibꞌ pero kꞌo unimal kiꞌkotemal kukꞌ. Kebꞌan kꞌu riꞌ xebꞌek chaꞌ keꞌkibꞌiꞌij chike rutijoꞌn janipa ri xkilo y ri xbꞌiꞌx bꞌi chike. E kꞌo kꞌu chi bꞌe 9 echiriꞌ ri Jesús xebꞌukꞌulu y xuya rutzil kiwach. Ekꞌu rike xeqibꞌ rukꞌ y xkixuk kibꞌ chwach; xkilaqꞌapuj ri raqan y xkiloqꞌnimaj uqꞌij.

10 Ri Jesús xubꞌiꞌij kꞌu chike:

—Mixiꞌij iwibꞌ. Jix, jiꞌbꞌiꞌij chike ri nu hermanos chaꞌ kebꞌek chilaꞌ Galilea y chiriꞌ kakil wi nuwach —xchaꞌ.

Ri raqꞌubꞌal xkiꞌan ri e chajinel re ri muqubꞌal

11 Ekꞌuchiriꞌ e kꞌo pan rixoqibꞌ pa bꞌe, jujun chike ri e chajinel xebꞌek pa ri tinamit y xeꞌkitzijoj chike ri nimaq e aj chakunel pa Rocho Dios ronoje ri xkikꞌulumaj. 12 Ekꞌu ri nimaq e aj chakunel pa Rocho Dios kukꞌ ri nimaq winaq re ri tinamit, xkichꞌaꞌbꞌej kibꞌ chaꞌ kakiꞌan tzij chikiwach. Xkiya kꞌu ukꞌiyal puaq chike ri soldados 13 y xekitaq che jewaꞌ kakibꞌiꞌij: «Echiriꞌ okinaq lo qawaram chaqꞌabꞌ, xekꞌun rutijoꞌn ri Jesús y xkelaqꞌaj bꞌi rucuerpo. 14 Yey we xretaꞌmaj waꞌ ri taqanel, riꞌoj kaqakoj pujolom chaꞌ na jinta kꞌo kuꞌan chiwe» kechaꞌ.

15 Ri soldados xkikꞌam kꞌu ri puaq y e xkiꞌano janipa ri xbꞌiꞌx chike. Ekꞌu raj judiꞌabꞌ kꞌa e ubꞌiꞌxikil waꞌ kakiꞌan waqꞌij ora.

Ri taqanik xyaꞌ kan ruma ri Jesús

(Mr. 16:14-18; Lc. 24:36-49; Jn. 20:19-23)

16 E taq kꞌu ri junlajuj utijoꞌn xebꞌek Galilea chwa ri jun juyubꞌ pa ubꞌiꞌim wi ri Jesús chike. 17 Echiriꞌ xkil uwach ri Jesús, lik xkiloqꞌnimaj uqꞌij, tobꞌ kꞌu e kꞌo jujun chike kꞌamajaꞌ kakikojo we paqatzij wi ri Jesús xkꞌastaj lo chikixoꞌl ri ekaminaq.

18 Ekꞌuchiriꞌ, xqibꞌ ri Jesús kukꞌ y xubꞌiꞌij chike:

—Riꞌin yaꞌtal lo panuqꞌabꞌ ronoje ri taqanik chilaꞌ chikaj y che ruwachulew. 19 Ruma kꞌu waꞌ, jix kukꞌ konoje rukꞌiyal kiwach taq ri tinamit che ruwachulew, chiꞌana kꞌu e nutijoꞌn chike y chiyaꞌa ri bautismo chike pa rubꞌiꞌ ri Qaqaw Dios, Rukꞌajol y ri Santowilaj Ruxlabꞌixel. 20 Chikꞌutu chikiwach rike chaꞌ e kakiꞌan ronoje janipa ri ixnutaqom riꞌin che. Lik chiwetaꞌmaj kꞌut: Riꞌin kinkꞌojiꞌ iwukꞌ ronoje qꞌij kꞌa che ri kꞌisbꞌal re ruwachulew —xchaꞌ. Amén.

<- Mateo 27