Juan 3

Ri Jesús kachꞌaꞌt rukꞌ ri Nicodemo

1 Kꞌo jun achi Nicodemo rubꞌiꞌ; rire e kukꞌil ri fariseos yey e jun aj wach ke raj judiꞌabꞌ. 2 Rire xeꞌbꞌina rukꞌ ri Jesús chaqꞌabꞌ y xubꞌiꞌij che:

—Lal tijonel, lik qꞌalaj lal taqom lo la ruma ri Dios re koꞌlkꞌutun la chiqawach, ma na jinta junoq kaꞌanaw janipa wa kꞌutubꞌal kaꞌan la, we na jinta ri Dios rukꞌ —xchaꞌ.

3 Ekꞌu ri Jesús xubꞌiꞌij che:

—Paqatzij wi kambꞌiꞌij cheꞌla: E junoq we na kalax ta tanchik, riꞌ na kayaꞌtaj ta che kok chupa rutaqanik ri Dios —xchaꞌ.

4 Ri Nicodemo xutzꞌonoj che:

—¿Suꞌanik kꞌu riꞌ kalax junoq e laꞌ nim chik? ¿Utz nebꞌa laꞌ kamatzex tanchi ruma ruchu chaꞌ kalax tanchik? —xchaꞌ.

5 Ri Jesús xukꞌul uwach:

—Paqatzij wi kambꞌiꞌij cheꞌla: China ri na kalax ta rukꞌ yaꞌ y rukꞌ ri Ruxlabꞌixel ri Dios, riꞌ na taqal ta che kok chupa rutaqanik ri Dios. 6 E junoq kalax kuma ruchu-uqaw, riꞌ lik rewi e jun tikawex; noꞌj ri kalax ruma ri Ruxlabꞌixel ri Dios, riꞌ kꞌo ukꞌaslemal chwach ri Dios. 7 Makam kꞌu animaꞌ la che wa ximbꞌiꞌij cheꞌla: “Lik chirajawaxik chike konoje ri tikawex kebꞌalax na tanchik.” 8 E pachaꞌ ri tew xa tobꞌ pa kawelel wi, xew kata la kajuxuxik, pero na etaꞌam ta la pa kape wi y pa kumaj wubꞌi. Jekꞌulaꞌ ri kebꞌalax ruma ri Ruxlabꞌixel ri Dios na kilitaj taj suꞌanik ri Dios kuya ri kꞌakꞌ kikꞌaslemal —xchaꞌ.

9 Ekꞌu ri Nicodemo xutzꞌonoj tanchik:

—¿Suꞌanik kuꞌana waꞌ? —xchaꞌ.

10 Ri Jesús xukꞌul uwach:

—Lal tijonel chikiwach raj Israel, ¿yey na etaꞌam tane la waꞌ? 11 Paqatzij wi kambꞌiꞌij waꞌ cheꞌla: Riꞌoj e kaqatzijoj janipa ri qetaꞌam y ri qilom; na rukꞌ ta kꞌu riꞌ, ralaq na kakoj ta alaq saꞌ ri kantzijoj che alaq. 12 We na kakoj ta alaq echiriꞌ kintzijon puwi taq ri xa re ruwachulew, ¿saꞌ kꞌu uꞌanik riꞌ kakoj alaq echiriꞌ kintzijon chiwach alaq puwi taq ri re ri Dios kꞌo chilaꞌ chikaj? 13 Na jinta junoq bꞌenaq chilaꞌ chikaj, xew ri jun petinaq chilaꞌ, waꞌ e Ralaxel Chikixoꞌl Tikawex. 14 Ma jelaꞌ pachaꞌ xuꞌan ri Moisés echiriꞌ xuyak jun kumatz chutzaꞌm jun cheꞌ pa ri luwar katzꞌintzꞌotik;[a] jekꞌulaꞌ lik chirajawaxik wi Ralaxel Chikixoꞌl Tikawex kayakiꞌ chwa jun cheꞌ[b] 15 chaꞌ china ri kakubꞌiꞌ ukꞌuꞌx rukꞌ Rire, na kasach ta uwach, ma kꞌo ukꞌaslemal na jinta utaqexik.

Ri rutzil ukꞌuꞌx ri Dios chike ri tikawex

16 »Ri Dios lik kꞌax xebꞌunaꞌ ri e kꞌo che ruwachulew; y ruma kꞌu waꞌ, xutaq lo Rukꞌajol, ri lik xew Ukꞌajol riꞌ, chaꞌ china ri kakubꞌiꞌ ukꞌuꞌx rukꞌ Rire na kasach ta uwach, ma kꞌo ukꞌaslemal na jinta utaqexik. 17 Ma ri Dios na xutaq ta lo Rukꞌajol che ruwachulew re koluꞌqꞌata tzij pakiwi ri tikawex; ri xutaq wuloq e chaꞌ kebꞌoluꞌkolobꞌej. 18 China kꞌu ri kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ri qꞌatbꞌal tzij re ri Dios puwiꞌ; noꞌj china ri na kakubꞌiꞌ ta ukꞌuꞌx rukꞌ, riꞌ kꞌo chi ri qꞌatbꞌal tzij re ri Dios puwiꞌ ruma na xukoj ta rubꞌiꞌ Rukꞌajol ri Dios, ri lik xew Ukꞌajol riꞌ. 19 Yey ri qꞌatbꞌal tzij kuꞌan ri Dios e ruma waꞌ: Ri Qꞌijsaq re ri Dios xkꞌun che ruwachulew, pero taq ri tikawex e más xukꞌul kikꞌuꞌx ri qꞌequꞌmalil re ri mak chwa ri Qꞌijsaq; ma ri ketajin che uꞌanik, lik na chom taj. 20 Konoje ri kakiꞌan ri na utz taj, tzel kakil ri Qꞌijsaq y na keqibꞌ ta rukꞌ chaꞌ na kaqꞌalajin ta ri na utz taj ketajin che uꞌanik. 21 Noꞌj konoje ri kakitijoj kibꞌ che jun saqil bꞌinik silabꞌik, riꞌ keqibꞌ chwach ri Qꞌijsaq chaꞌ kaqꞌalajinik, ri ketajin che uꞌanik e ri karaj ri Dios chike —xchaꞌ.

Ri Juan Aj Yaꞌl Bautismo kuyak uqꞌij ri Jesús

22 Tekꞌuchiriꞌ, ri Jesús junam kukꞌ rutijoꞌn xebꞌek Judea; ukꞌiyal qꞌij xkꞌojiꞌ chiriꞌ kukꞌ y kuya ri bautismo chike ri tikawex. 23 Ekꞌu ri Juan katajin che uyaꞌik ri bautismo pa ri tinamit Enón chunaqaj Salim, ma chilaꞌ lik kꞌo yaꞌ. Kebꞌopon kꞌu ri tikawex rukꞌ chaꞌ kakikꞌul ri bautismo. 24 Ri Juan xuꞌan waꞌ echiriꞌ kꞌamajaꞌ kayaꞌiꞌ pa cárcel.

25 Ekꞌuchiriꞌ, jujun chike rutijoꞌn ri Juan kukꞌ jujun e aj judiꞌabꞌ xkijeq kechꞌaꞌt chwi taq ri taqanik chwi ri kijosqꞌikil chwach ri Dios. 26 Xebꞌek kꞌut xeꞌkibꞌiꞌij che ri Juan:

—Lal tijonel, tape la, e ri jun xopon ukꞌ la chꞌaqa yaꞌ che ri nimayaꞌ Jordán, ri xqꞌalajisan la puwiꞌ, woꞌora katajin che uyaꞌik ri bautismo y konoje ri tikawex eteran chirij —xechaꞌ.

27 Ekꞌu ri Juan xubꞌiꞌij chike:

«Na jinta kꞌo kukꞌul junoq we na e ta ri Dios chilaꞌ chikaj kayaꞌw re che. 28 Riꞌix xinito echiriꞌ ximbꞌiꞌij chiwe: Riꞌin na in ta Ruchaꞌoꞌn lo ri Dios, xa in jun qꞌalajisanel intaqom lo nabꞌe chwach Rire.

29 »E pachaꞌ pa juna kꞌulanikil. Ri lik kꞌo uwach na e ta ri ramigo rala, e rala kakꞌuliꞌik ma e ukꞌaꞌyom re rali. Yey ri ramigo kꞌo putzal rala, e lik kakiꞌkot che utayik ri kubꞌiꞌij rala. Jekꞌulaꞌ riꞌin woꞌora lik kinkiꞌkotik ma ya xkꞌun ri Cristo. 30 Lik kꞌu chirajawaxik más kanimarisax uqꞌij rire, chwa ri kanimarisax nuqꞌij riꞌin.

Ri Jun kape chilaꞌ chikaj

31 »Ri jun kape chilaꞌ chikaj, e más nim uwach uqꞌij chikiwa konoje. Ekꞌu junoq na re ta chilaꞌ chikaj, e re ruwachulew y e kachꞌaꞌt puwi taq ri re ruwachulew. Noꞌj ri jun kape chilaꞌ chikaj, e más lik nim uwach uqꞌij chikiwa konoje. 32 Yey rire e kuqꞌalajisaj saꞌ ri rilom y saꞌ rutom che ri Dios; na rukꞌ ta kꞌu riꞌ, taq ri winaq na kakikoj taj. 33 Yey we kꞌo junoq kakojow ri kuqꞌalajisaj rire, riꞌ kujikibꞌaꞌ uwach lik qatzij ri kubꞌiꞌij ri Dios. 34 Ma ri jun taqom lo ruma ri Dios, e kutzijoj ri kubꞌiꞌij ri Dios. Ma ri Dios na xuxuꞌyaj ta ri Ruxlabꞌixel uyaꞌom che; e uwariꞌche, xaqi kꞌo ri Ruxlabꞌixel rukꞌ. 35 Ri Dios lik kꞌax kunaꞌ Rukꞌajol yey uyaꞌom puqꞌabꞌ rire ronoje ri kꞌolik. 36 China kꞌu ri kakubꞌiꞌ ukꞌuꞌx rukꞌ Rukꞌajol ri Dios, kꞌo ukꞌaslemal na jinta utaqexik; noꞌj china ri na karaj taj kakubꞌiꞌ ukꞌuꞌx rukꞌ Rukꞌajol ri Dios, riꞌ na jinta ukꞌaslemal rukꞌ ri Dios yey qꞌatom chi tzij puwiꞌ ruma ri Dios» xchaꞌ.

<- Juan 2 Juan 4 ->