Hebreos 4

Ri uxlanem kuya ri Dios chiqe

1 Kꞌa waqꞌij ora, ri Dios kubꞌiꞌtisij ri uxlanem kuya Rire. Ruma riꞌ, lik chajij ibꞌ alaq ma kꞌaxtaj kꞌo junoq che alaq na kopon ta che wa uxlanem. 2 Ma riꞌoj lik qatom ri Utzilaj Tzij puwi ri uxlanem kuya ri Dios. Jenelaꞌ rutinamit ri Dios ojertan xkita puwi ri uxlanem ubꞌiꞌtisim ri Dios chike; pero na jinta xutiqoj ri xkito, ma na xkikꞌul ta waꞌ rukꞌ kubꞌulibꞌal kꞌuꞌxaj. 3 Noꞌj we riꞌoj qakojom ri Utzilaj Tzij, kojok kꞌu riꞌ pa ri uxlanem kuya ri Dios. Ma jewaꞌ xubꞌiꞌij Rire pa Ruchꞌaꞌtem:

E uwariꞌche, ruma woyowal lik xinjikibꞌaꞌ uwach waꞌ:

“Rike na kebꞌok ta kꞌana pa ri uxlanem kanya Riꞌin”[a] Sal. 95:10-11

xchaꞌ. Yey chwi lo echiriꞌ ri Dios xuꞌan ruwachulew, xukꞌis uꞌanik ruchak. 4 Ma chupa Ruchꞌaꞌtem ri Dios jewaꞌ tzꞌibꞌital kan chwi ruwuq qꞌij:

Chupa ruwuq qꞌij ri Dios xuxlan che ri chak xuꞌano. Gn. 2:2

5 Kambꞌiꞌij tanchi kꞌu ri kubꞌiꞌij ri Dios pa Ruchꞌaꞌtem puwi wa uxlanem: «Rike na kebꞌok ta kꞌana pa ri uxlanem kanya Riꞌin» kachaꞌ. 6 Ma e taq ri nabꞌe xkita ri Utzilaj Tzij puwi ri uxlanem ubꞌiꞌtisim ri Dios chike, na xebꞌok ta pa ri luwar re uxlanem ruma xkipalajij utzij Rire. Yey e kꞌo ne ri kꞌamajaꞌ kebꞌok pa ri uxlanem kuya ri Dios. 7 E uwariꞌche, ri Dios uqꞌatom uqꞌijol echiriꞌ kubꞌiꞌtisij tanchi wa uxlanem chike ri tikawex, yey waꞌ e “waqꞌij ora”. Ma ukꞌiyal junabꞌ ikꞌowinaq chik echiriꞌ ri rey David jewaꞌ xutzꞌibꞌaj kan pa Ruchꞌaꞌtem ri Dios:

We kita riꞌix waqꞌij ora

janipa ri kubꞌiꞌij ri Dios chiwe,

miꞌan ko che ri iwanimaꞌ Sal. 95:7-8

xchaꞌ. 8 We ta e laꞌ ri Josué asu xuya ri uxlanem chike ri tinamit,[b] ri Dios na uqꞌatom ta chi juna chik qꞌij riꞌ re uxlanem chiqawach apanoq. 9 Noꞌj ruma waꞌ, qetaꞌam kꞌa kꞌo jun uxlanem chike rutinamit ri Dios. 10 Ma china ri kok pa ri uxlanem kuya ri Dios, kuxlan riꞌ che ruchak, jelaꞌ pachaꞌ xuxlan ri Dios che ri chak xuꞌano.

11 Qachuqꞌubꞌej kꞌu qibꞌ chaꞌ kojok pa ri uxlanem kuya ri Dios, chaꞌ jelaꞌ na jinta junoq chiqe kuꞌana aj palajiy tzij y kukꞌulumaj kꞌut jelaꞌ pachaꞌ ri xkikꞌulumaj ri na xkikoj ta utzij ri Dios ojertan. 12 Ma Ruchꞌaꞌtem ri Dios lik kꞌaslik y lik kꞌo uchuqꞌabꞌ. E ne pachaꞌ más kꞌo reꞌ chwa juna espada kaꞌibꞌ uwi reꞌ, ri kopon kꞌa che taq rigonsiyil y kok kꞌa pa kꞌo wi taq ri sulus chupa ri bꞌaq. Jekꞌulaꞌ Ruchꞌaꞌtem ri Dios kopon ne kꞌa chupa rukꞌuꞌx y ri ranimaꞌ juna tikawex, yey kuqꞌalajisaj kꞌu runaꞌoj ri tikawex y taq ri rayibꞌal kꞌo chupa ri ranimaꞌ. 13 Ronoje taq ri ꞌanatal ruma ri Dios, chwach Rire kꞌo wi. Ruma kꞌu riꞌ, Rire karil ronoje y na jinta kꞌo ewatal chwach. Yey kopon ne ri qꞌij echiriꞌ kojopon chwach Rire chaꞌ kuqꞌat tzij paqawiꞌ ruma ri qaꞌanom.

Ri Jesús e Qajawal kachꞌaw paqawiꞌ chwach ri Dios

14 Ruma kꞌu laꞌ e qachuqꞌubꞌej qibꞌ che ri xqajikibꞌaꞌ uwach echiriꞌ xqakoj rubꞌiꞌ ri Cristo y maqesaj qibꞌ che waꞌ. Ma ri Jesús, Rukꞌajol ri Dios, e Qajawal; yey Rire okinaq chilaꞌ chikaj y kachꞌaw paqawiꞌ chwach ri Dios. 15 Yey ri Qajawal, ri kachꞌaw paqawiꞌ chwach ri Dios, lik kꞌo kꞌaxnaꞌbꞌal ukꞌuꞌx chiqe, ma Rire lik kumaj usukꞌ ronoje ri kaqikꞌowibꞌej riꞌoj oj tikawex ruma lik kꞌayew chiqe kaqachꞌij uchuqꞌabꞌ ri mak. Ma Rire echiriꞌ xuꞌan tikawex, lik xkꞌam upa che ronoje jelaꞌ pachaꞌ kaꞌan chiqe riꞌoj, noꞌj Rire xuchꞌij uchuqꞌabꞌ waꞌ y na xmakun ta kꞌenoq. 16 E uwariꞌche, muxiꞌij ribꞌ qakꞌuꞌx kojqibꞌ chwach ri Dios, ri kꞌo unimal rutzil kꞌuꞌxaj rukꞌ, chaꞌ kaqakꞌul kuybꞌal qamak y kaqariq toꞌbꞌal qe echiriꞌ kajawax chiqe.

<- Hebreos 3 Hebreos 5 ->