Hechos 2

Rukꞌunibꞌal ri Ruxlabꞌixel ri Dios

1 Echiriꞌ xopon ri nimaqꞌij re Pentecostés[a] e taq rutijoꞌn ri Jesús kimolom kibꞌ, konoje uꞌanom xa jun kikꞌuꞌx. 2 Xaqikꞌateꞌt kꞌut chilaꞌ chikaj xpe pachaꞌ uchꞌawibꞌal juna unimal tew lik kajuxuxik, yey waꞌ xunojisaj ronoje upa ri ja pa kimolom wi kibꞌ. 3 Ekꞌuchiriꞌ, xewinaqir pachaꞌ urepebꞌal aqꞌ y waꞌ xkꞌojiꞌ pakiwiꞌ chikijujunal rike. 4 Yey konoje ri e kꞌo chiriꞌ xkikꞌul ruchuqꞌabꞌ ri Santowilaj Ruxlabꞌixel, y xkijeq kꞌu riꞌ kechꞌaꞌt pa jujun chik chꞌaꞌtem junwi. Chikijujunal kechꞌaꞌt pa ri chꞌaꞌtem xyaꞌtaj chike ruma ri Ruxlabꞌixel.

5 Chiriꞌ kꞌut Jerusalem e kꞌo e aj judiꞌabꞌ lik kakiloqꞌnimaj uqꞌij ri Dios. Rike e petinaq pa taq ukꞌiyal tinamit che ruwachulew. 6 Echiriꞌ xkita waꞌ wa chꞌawibꞌal, xepe che rilik. Yey lik xsach kinaꞌoj ma chikijujunal xekito kechꞌaꞌt pa taq ri kichꞌaꞌtem ke rike. 7 Ekꞌu laꞌ lik kaminaq kanimaꞌ che, xkijeq kakibꞌiꞌij chikiwach: «¡Chilape alaq! ¿Na e ta nebꞌa aj Galilea konoje wa kechꞌaꞌtik? 8 ¿Chaꞌta kꞌu riꞌ chiqajujunal keqato kechꞌaꞌt pa taq ri qachꞌaꞌtem oj alaxinaq wi riꞌoj? 9 Yey lik pa ukꞌiyal tinamit oj petinaq wi. Chiqaxoꞌl e kꞌo e aj Partia, e aj Media y e aj Elam. Yey e kꞌo ri ejeqel Mesopotamia, Judea, Capadocia, Ponto y Asia, 10 Frigia y Panfilia, Egipto y pa taq ri luwar re Libia chwach pana ri tinamit Cirene. Yey e kꞌo ri e petinaq Roma; chikixoꞌl waꞌ e kꞌo e aj judiꞌabꞌ y e kꞌo ne ri na e ta aj judiꞌabꞌ kitaqem lo ri kꞌutunik ke raj judiꞌabꞌ. 11 E kꞌo e aj Creta y ri e aj Arabia. Yey chiqajujunal riꞌoj kaqato kechꞌaꞌt pa qachꞌaꞌtem puwi taq ri kꞌutubꞌal re runimal uchuqꞌabꞌ ri Dios» kechaꞌ.

12 Konoje kꞌut lik kaminaq kanimaꞌ che y na kakiriq ta chik saꞌ ri kakichꞌobꞌ puwiꞌ, jekꞌuwaꞌ kakibꞌiꞌij chikiwach: «¿Saꞌ keꞌelawi waꞌ?» kechaꞌ. 13 Yey e kꞌo kꞌu jujun chik kechꞌamin ke y jewaꞌ kakibꞌiꞌij: «Laꞌ keqꞌabꞌarik» kechaꞌ.

Ri nabꞌe tzijonik xuꞌan ri Pedro puwi ri Jesús

14 Ekꞌuchiriꞌ, ri Pedro xtakꞌiꞌik junam kukꞌ ri junlaluj chik taqoꞌn y lik ko xchꞌawik, jewaꞌ xubꞌiꞌij:

«Achijabꞌ alaq aj judiꞌabꞌ y onoje ri alaq jeqel wara Jerusalem, tape alaq chi utz ri kanqꞌalajisaj che alaq. 15 Ma e chiwach ralaq, waꞌ waꞌchijabꞌ keqꞌabꞌarik, noꞌj ¡na e ta uꞌanom riꞌ! Ma kꞌa e ne bꞌelejebꞌ ora[b] laꞌ che wa anim. 16 Janipa wa kata alaq y kil alaq woꞌora, waꞌ e ri ubꞌiꞌim chi kan ri qꞌalajisanel Joel ojertan, echiriꞌ jewaꞌ xubꞌiꞌij:

17 “Che taq rukꞌisbꞌal qꞌij” kubꞌiꞌij ri Dios,

“kantaq bꞌi ri Wuxlabꞌixel pakiwi konoje ri tikawex che ruwachulew.

E taq kꞌu ri miꞌal alkꞌoꞌal alaq kakiqꞌalajisaj ri Nutzij.

Ralabꞌo kakilo janipa ri kankꞌut chikiwach;

yey e ri nimaq winaq, pa wachikꞌ kakil wi janipa ri kanqꞌalajisaj chikiwach.

18 Chupa taq kꞌu riꞌ laꞌ la qꞌij, pakiwi ri e waj chak ixoqibꞌ y achijabꞌ kantaq bꞌi ri Wuxlabꞌixel

chaꞌ jelaꞌ kakiqꞌalajisaj ri Nutzij chikiwach ri tikawex.

19 Chwa ri kaj kankꞌut taq kꞌutubꞌal re nuchuqꞌabꞌ yey waꞌ na jinta ilitajinaq wi

y che ruwachulew kanꞌan kꞌutubꞌal rukꞌ kikꞌ, rukꞌ aqꞌ y rukꞌ mayul re sibꞌ.

20 Ekꞌu ri qꞌij kuꞌan qꞌequꞌm uwach

yey ri ikꞌ kuꞌan kaq uwach pachaꞌ kikꞌ;

waꞌ e kuꞌana echiriꞌ ya kopon ruqꞌijol ri Qanimajawal.

Waꞌ wa jun qꞌij lik nim y na jinta kꞌo kajunimax wi ruchomalil.

21 Y konoje kꞌu ri kakikoj kibꞌ chwach ri Qanimajawal re kebꞌukolobꞌej, riꞌ kekolobꞌetajik” Jl. 2:28-32

xchaꞌ.

22 »Achijabꞌ alaq aj Israel, tape alaq janipa wa kambꞌiꞌij che alaq woꞌora: Ri Jesús ri aj Nazaret, Rire e ri Jun taqom lo chixoꞌl alaq ruma ri Dios. Lik etaꞌam kꞌu alaq ri xuꞌan ri Dios ruma ri Jesús chixoꞌl alaq, waꞌ e ukꞌiyal milagros y taq kꞌutubꞌal re ri unimal uchuqꞌabꞌ ri Dios. 23 Yey ri Dios lik uchꞌobꞌom chi uloq y retaꞌam suꞌchak xuya ri Jesús paqꞌabꞌ alaq. Ekꞌu ralaq xchap bꞌi alaq y xtaq alaq ukamisaxik chwa cruz kuma winaq na jinta Rutzij Upixabꞌ ri Dios kukꞌ.[c] 24 Pero ri Dios xukꞌastajisaj loq y xresaj chupa rukꞌaxkꞌolil ri kamik, ma ri kamik na jinta uchuqꞌabꞌ puwi Rire y ruma riꞌ, Rire na xkꞌojiꞌ ta puqꞌabꞌ ri kamik.

25 »Rojertan xubꞌiꞌij kan ri rey David puwi ri Cristo:

Riꞌin kanwil ri Wajawal xaqi e laꞌ kꞌo chinuwach.

Ruma kꞌu kꞌo Rire pa nuwikiqꞌabꞌ,

na jinta kꞌana kayuchꞌuyuꞌn weꞌin.

26 E uwariꞌche ri wanimaꞌ lik xkiꞌkotik

y ruchiꞌ nuqul xbꞌixon rukꞌ kiꞌkotemal.

Ekꞌu riꞌin, tobꞌ ne wetaꞌam kinkamik,

e laꞌ kꞌo chi ri nukubꞌam pan nukꞌuꞌx che;

27 ma Rilal na kinya ta kan la chikixoꞌl ri ekaminaq,

yey na kaya tane la luwar kaqꞌay rucuerpo ri aj chak la,

ri jun lik uyaꞌom ribꞌ paqꞌabꞌ la.

28 Rilal xkꞌut la chinuwach ri bꞌe re kꞌaslemal.

Ruma kꞌu xaqi Lal kꞌo la wukꞌ riꞌin,

kanojisaj la ri wanimaꞌ che kiꞌkotemal Sal. 16:8-11

xchaꞌ.

29 »Hermanos, paqatzij wi lik usukꞌ kankuxtaj waꞌ che alaq: Ri rey David ojertan, xkamik y xmuqik, y kꞌa qꞌalaj ne chiqawach riꞌoj waqꞌij ora pa kꞌo wi rumuqubꞌal. 30 Yey ri rey David e jun qꞌalajisanel; xretaꞌmaj kꞌu riꞌ ri Dios rukꞌ jun tzij xujikibꞌaꞌ uwach che rire: “Chikixoꞌl taq ri awalkꞌoꞌal, kayaktaj lo ri Cristo chaꞌ kuꞌan Rey y katzꞌuyiꞌ pakꞌaxel riꞌat.”

31 »Yey ri rey David xchꞌaꞌtik e pachaꞌ rilom chi rukꞌastajibꞌal ri Cristo echiriꞌ xubꞌiꞌij: “Na kakanaj ta kan Rire chikixoꞌl ri ekaminaq y na kaqꞌay tane rucuerpo.”[~4~] 32 Ekꞌu waꞌ wa Jesús ri xukꞌastajisaj ri Dios che ri kamik; yey waꞌ lik qatzij, ma qonoje riꞌoj xqilo. 33 Lik kꞌu xyak uqꞌij echiriꞌ xtzꞌuyiꞌ puwikiqꞌabꞌ ri Dios. Yey xyaꞌtaj che Rire kutaq lo paqawi riꞌoj ri Santowilaj Ruxlabꞌixel, ri ubꞌiꞌtisim lo ri Qaqaw Dios chiqe riꞌoj. Y ekꞌu riꞌ waꞌ ri kil alaq y kata alaq.

34 »Ma na e ta ri David ri xaqꞌan chilaꞌ chikaj, pero e rire ri xubꞌiꞌij:

Ri Dios Qajawxel xubꞌiꞌij che ri Wajawal:

“Chat-tzꞌula pa nuwikiqꞌabꞌ,

35 y chawoyeꞌej na ri qꞌij

echiriꞌ kebꞌenuya ri tzel kebꞌilow awe

chuxeꞌ rawaqan” Sal. 110:1

xchaꞌ.

36 »Tape alaq onoje ri alaq aj Israel, ma lik chirajawaxik ketaꞌmaj kꞌu alaq: Wa Jesús ri xkamisaj alaq chwa cruz, e chaꞌtal lo ruma ri Dios re kuꞌan Qajawal y Kolobꞌenel» xcha ri Pedro chike.

37 Ekꞌuchiriꞌ xkita waꞌ, lik xok bꞌis chikikꞌuꞌx y jewaꞌ xkibꞌiꞌij che ri Pedro y chike ri jujun chik e taqoꞌn:

—Hermanos, ¿saꞌ kꞌu riꞌ kaqaꞌan riꞌoj? —xechaꞌ.

38 Y ri Pedro xubꞌiꞌij chike:

—Tzelej tzij alaq chwach ri Dios y chijujunal alaq kꞌulu alaq pa rubꞌiꞌ ri Qanimajawal Jesucristo ri bautismo re kuybꞌal mak alaq y jelaꞌ kakꞌul na kꞌu alaq ri Santowilaj Uxlabꞌixel, waꞌ e sipanik re ri Dios che alaq. 39 Ma ri Dios ubꞌiꞌtisim waꞌ chike konoje janipa ri kebꞌusikꞌij: che ralaq, chike taq ri alkꞌoꞌal alaq y chike ne konoje ri ejeqel lik naj che ri tinamit re Israel —xcha ri Pedro chike.

40 Jekꞌulaꞌ, xebꞌupixabꞌaj rukꞌ ukꞌiyal chꞌaꞌtem y jewaꞌ xujikibꞌaꞌ uwach chike:

—Chesaj lo ibꞌ alaq chikixoꞌl waꞌ wa winaq lik na jusukꞌ ta ri kiꞌanom, chaꞌ jelaꞌ kakolobꞌetaj alaq chwach ri qꞌatbꞌal tzij kape pakiwiꞌ —xcha chike.

41 Janipa kꞌu riꞌ ri xekojow Rutzij ri Dios ruma ri xubꞌiꞌij ri Pedro, xkikꞌul ri bautismo. Yey chupa kꞌu laꞌ la jun qꞌij, laj e oxibꞌ mil ri xkikoj rubꞌiꞌ ri Cristo. 42 Y konoje lik junam kebꞌin chupa ri saqil kꞌutunik ke ri e taqoꞌn re ri Jesús, junam kikꞌuꞌx, junam kewaꞌ chikiwach y junam kakiꞌan orar.

Ri kibꞌinik kisilabꞌik ri nabꞌe tikawex xekojow rubꞌiꞌ ri Cristo

43 Konoje kꞌu ri tikawex xok xiꞌin ibꞌ pa kanimaꞌ ruma taq ri milagros y kꞌutubꞌal kuꞌan ri Dios kuma ri e utaqoꞌn ri Cristo. 44 Konoje kꞌu ri xekojow rubꞌiꞌ ri Cristo, lik xuꞌan xa jun kikꞌuꞌx chikiwach y rubꞌitaq ke chikijujunal xuꞌan re chinima ronoje. 45 E kꞌo ri xkikꞌayij kulew y ubꞌitaq ke, yey ekꞌu ri rajil waꞌ, kakijach chikiwach e chirij taq ri kajawax wi chike chikijujunal. 46 Ronoje qꞌij kakimol kibꞌ chupa ri Rocho Dios. Yey pa taq ri kocho kakijach chikiwach ri kakitijo, junam kewaꞌ rukꞌ kiꞌkotemal y rukꞌ uchꞌutiꞌnal kikꞌuꞌx. 47 Kakiyak kꞌu uqꞌij ri Dios y lik chom ri kichꞌaꞌtibꞌexik kaꞌan kuma konoje ri tikawex re ri tinamit. Yey ronoje qꞌij e kꞌo más tikawex katajin kikolobꞌetajik ruma ri Qanimajawal, y jelaꞌ xkꞌiyar riglesia.

<- Hechos 1 Hechos 3 ->