2 Timotius

Tabe ma haan buseet

1-2 Timotius, atoin reko!

Surat reꞌ ia naꞌko au, naiꞌ Paulus kau, reꞌ Uisneno neikn On anruur kau he ꞌjair Yesus Kristus In haef. Sin nreek haefan kau he ꞌnao utoon rasi nmatoom nok ꞌmonit reꞌ batuur, reꞌ Uisneno nbaꞌan he nfee je neu areꞌ apirsait ein neun Yesus Kristus.

Timotius! Ho on reꞌ au aanh aa kuuk. Onaim au ꞌonen he hit Amaꞌ Uisneno, ma hit Usiꞌ, Yesus Kristus, anneek ko, nakriraꞌ Sin neek reok goe neu ko, ma nfee ko ꞌmonit ambi mamut, rameꞌ es nok es, ma taininaꞌ.[a]

Naiꞌ Paulus antoit makasi neu Uisneno

3 Au ꞌonen fai-manas ma ꞌteek ko. Au ꞌtoit makasi piut-piut ꞌeu Uisneno, natuin ho mutuin Ee piut. Au ꞌtuthae Je nok neek akninuꞌ, on reꞌ hit beꞌi-naꞌi sin antuthae Je. 4 Au umnau, oras hit tbaits ok neno naan, ho mkae mpin-pinus. Etun au ꞌroim he uteef aꞌtein ꞌok ko, maut he au ꞌmariin.

5 Au umnau neno naan, oras ho mmurai mpirsai batuur-batuur meu Usif Yesus. Rais pirsait human on reꞌ naan, naꞌuu ma naꞌbaaꞌ nain naꞌko ho beꞌi bi Luisa, ma ho ainaꞌ bi Yunika in nekan. Ma au aꞌtebes amsaꞌ ꞌak rais pirsait human on reꞌ naan anmoin et ho nekam amsaꞌ.[~2~]

Naiꞌ Paulus antoit he naiꞌ Timotius anpaek manoef ma mahinif reꞌ Uisneno nfee ne sin

6 Neno naan, oras au ꞌait au ꞌniimk ein ma ꞌtao sin ꞌeu ko, rarit au ꞌonen aꞌteek ko, oras naan Uisneno ntao ko manoef ma mahinif he ho bisa mmeup meu Ne. Onaim oras ia, au ꞌtoit ko he munaobaꞌ mufaniꞌ ho manoef ma mahinif naan. 7 Fin Uisneno In Asmanan ka nmoeꞌ kit fa he tjair amtaus. Mes In nmoeꞌ kit atjair tuaf-tuaf reꞌ naꞌbeiꞌ ma npirsai in tuan, reꞌ anmaneek nahiin, ma nafreu nahiin in tuan ee rek-reko. 8 Onaim kais mumaeb om he muꞌuab anmatoom hit Usiꞌ. Ma kais mumaeb om natuin anhukun kau et bui. Au ꞌtaam bui reꞌ ia, natuin au ꞌtuthae hit Usiꞌ. Onaim karu ho mutoon Rais Reko naan ate, ho ro he mubarab ho tuam aan he musaah susat-maꞌneꞌat on reꞌ hai. Karu ho mupein susat-maꞌneꞌat on reꞌ naan, Uisneno of anhaꞌtain ko.

9-10 Natuin Uisneno es ansoi nafetin naan kit naꞌko hit saant am penu sin.

Ma In es anpiir naan kit he tjair In tuaf ein reꞌ atmoni kninuꞌ.

In nakriraꞌ In nekan reok goe neu kit, natuin In nneek kit.

Te kaah, hit ka tmoeꞌ tiit fa saaꞌ-saaꞌ es, he hit masoꞌik he ttoup In arekon.

Uisneno ka nmoeꞌ pah-pinan ia fa feꞌ, mes In nafeek anrair he nreek Yesus Kristus neem,

he nakriraꞌ In nekan arekot, ma nsoi nafetin kit.

Rarit Yesus Kristus neem anrair, ma nfei nrair sarit naan,

Ma In naseer rasi ꞌmaten in kuasan!

Ia njair Rais Reko!

Onaim sekau-sekau reꞌ anpirsai neu Yesus Kristus, ka nmate ntein fa goen, mes anmoin piut nok Uisneno.

11 Etun Uisneno nait kau ꞌjair haef ꞌeu Yesus Kristus, he au utoon In Rais Reko, ma unoniꞌ sekau-sekau nbi mee-mee.[~3~] 12 Rasin reꞌ naan ok-okeꞌ nmoeꞌ kau mꞌes naꞌ au upein ꞌhaꞌmuꞌit et bui ia in nanan. Mes au ka umaeb ok fa! Natuin au uhiin sekau es reꞌ au ꞌpirsai. In es reꞌ Usif Yesus. Ma au uhiin namneo-namneo ꞌak In es reꞌ nanaꞌat kau mepu reꞌ ia, In es reꞌ anpafaꞌ ma npanat mepu reꞌ ia, ma In es reꞌ anhaꞌtain kau he au bisa unaob mepu reꞌ ia, tar antea In nkoen On anfain neem. 13 Onaim mutuin nai ꞌtopeꞌ nbi ꞌmonit naꞌko noniꞌ amneot, reꞌ au ukriraꞌ sin ꞌeu ko. Karu ho mpirsai piut-piut, ma mneek sekau-sekau, ho mutoon ma mukriraꞌ mak ho mmafuut mok Yesus Kristus. 14 Uisneno nanaꞌat anrair aꞌmuꞌif maꞌosaꞌ huum es et ho ꞌnimam, es reꞌ noniꞌ arekot amneot. Onaim ampanat murek-rekoꞌ aꞌmuꞌif reꞌ naan! Ampaek Uisneno In Asmaan Akninuꞌ reꞌ et hit nekak, maut he In nturun ma nbaab ko, he mpanat aꞌmuꞌif naan rek-reko.

Naiꞌ Onisiforus anturun naiꞌ Paulus anbi bui

15 Ho of amneen amrair nak naiꞌ Figelus ma naiꞌ Hermogenes, sin atoin sonaꞌ naꞌkon propinsi Asia[~4~] sin nasaitan kau goen. 16-18 Mes naiꞌ Onisiforus ka on fa naan. In ka nasaitan kau fa. Ho muhiin kuum, oras au ꞌbi kota Efesus feꞌ, in nturun ma nbaab kau piut. Oras ia, in natua goen et kota Roma ia. Oras in neem antea, in naim kau neu-mneem anbi mee-mee. Namuni te, in nateef nok kau nbi bui. Mes in ka namaeb on fa. Fani-fani in neem anbi bui ia, ma nhaꞌtain au nekak.

Onaim au ꞌonen ma ꞌbaiseun ꞌeu Uisneno he nakriraꞌ In nekan arekot neu naiꞌ Onisiforus nok nain in nonot-asar sin. Anbi neon amsoupt ii te, oras Uisneno nafeek mansian ein sin rasin, au ꞌharap ma ufneek he karu reko te, Uisneno nafeek rais arekot neu naiꞌ Onisiforus sin.

2 Timotius 2 ->